DILI, STLNEWS.co – Polisia Nasional Timor-Leste (PNTL) liu husi Unidade Polisia Maritima (UPM), konsege Salva funsionariu nain haat husi Sekretaria Estadu Ambiente (SEA), iha tasi klaran neebe atu mout, bainhira halao viajen ho roo husi diresaun Metinaro mai Dili.
Tuir informasaun neebe STL asesu husi Media Officer Ministeriu Interior (MI) Sabadu kalan nee (29/04/2023), Komandante Unidade Polisia Maritiima (UPM), Superintendente Eugenio Pereira hateten, nia parte halo ona evakuasaun ba vitima nain haat nee, no sira lori sai ba rai maran.
“Ita simu informasaun iha oras 17:15 no orienta membru sira halo kedas intervensaun hodi salva funsionariu nain-4 husi Sekretaria Estadu Ambiente ne’ebe hetan dezastre iha tasi klaran area Hera nian, bainhira halo viajen ho roo husi diresaun Metinaro mai Dili”, esplika Eugenio Pereira liu husi telefone, Sabadu nee (29/04/2023).
Nia dehan, vitima ho kondisaun diak hotu tanba membru UPM sira halo intervensaun ho lalais tebes, hodi fornese servisu ho diak.
“Sira hetan dezastre nee tanba impaktu husi korente tasi neebe boot, halo engine ho medida 40 PK, monu sai husi roo nia body, enkuantu ita nia membru ho ekipa tekniku sira uza skypier husi MV-1 konsege lori sai vitima nain 4 ba rai maran ho situasaun ondas neebe boot”, dehan nia.
Komandante UPM nee alerta ba publiku atu kontaktu lalais ba Unidade Maritima PNTL, hodi buka ema neebe lakon iha tasi laran ka sai nudar vitima asidente maritimu nian.
“Ita nafatin servisu hodi fo asistensia ba kualker ema neebe hetan susar iha tasi laran, tanba nee alerta nafatin ba publiku atu informa lalais mai polisia neebe besik, hodi nunee ita bele salva ema neebe hasoru problema ka presiza tulun ho lalais,” hakotu nia.
(efi)
