DILI, STLNEWS.co – Oras nee dadaun iha kapital Dili transporte publiku hanesan mikrolet no taxi sira neebe halo movimentu iha Dili laran menus, tanba pasajeirus la barak hanesan loron baibain.
Kestaun nee hatoo husi juventude Laurentino dos Santo Oliveira ba STL iha Largo Lecidere, Segunda nee (18/04/2022).
“Transporte publiku hanesan mikrolet 10, 09, 07,11, 03, 04 neebe halao movimentu menus ona, la hanesan loron baibain, tanba aban ita hotu-hotu sei ba sentru votasaun hodi ezerse ita nian direitu,” hatete Laurentino.
Nia dehan, loron bainbain movimentu transporte publiku no privadu sira halao movimentu makas, ohin loron mikrolet numeru 10 nomos 09 maka ida rua halai iha Dili laran.
Iha fatin hanesan, pasajeirus Elena dos Reis informa, loron baibain Dili laran engarrafamentu ka macet, maibe loron ohin nee transporte iha Dili laran nee menus.
“Ita haree mikrolet sira nee iha balun deit maka tula pasajeirus iha Dili laran, maibe depois Dili laran hakmatek loos, no laiha engarrafamentu,” dehan nia.
Nia tenik, pasajeirus iha Dili laran mos menus, tanba ema barak maka horseik ho bainrua nee ba hotu ida-idak nian munisipiu hodi ezerse sira nian direitu, tanba nee kapital Dili hakmatek loos.
Numee mos kondutor Mikrolet 10, Nelson Maria Branco Silva esplika, oras nee dadaun transporte publiku menus, tanba pasajeirus laiha, tanba loron aban nee loron espesial ba povu hotu-hotu atu ba ida-idak nian munisipiu no balun hela iha nee, hakmatek aban ba ezerse sira nian direitu iha sentru votasaun.
(jen)