DILI, STLNEWS.co – Kondisaun estrada husi parte mota Komoro, hahu husi parte Tasi ibun, Pantai Kelapa too ba foho leten mota ulun hahu nakfera no monu.
Preokupasaun nee hatoo husi Deputadu Bankada FRETILIN, José Paicheco katak, kondisaun estrada iha mota Komoro husi Pantai Kelapa too Mota Ulun presiza fo atensaun, tanba nakfera no monu hotu ona.
“Mota Komoro kuaze hahu husi tasi ba too mota Manleu ulun nee nakfera hotu ona, ida nee ameasa ba Dili laran tomak, liu-liu ba populasaun sira neebe hela besik estrada ninin,” katak Jose Paicheco ba STL, Kinta horiseik (28/04/2022) Parlamentu Nasional.
Nia dehan, kondisaun estrada sira nakfera hotu, haree ba estrada sira iha moto ninin nee hahu monu tuun hotu ona, ida nee ameasa tebes, sa tan udan tau, bele estraga liu tan.
Entretantu, observasaun STL haree katak, kondisaun estrada iha parte mota Komoro hahu husi Pantai Kelapa too mota ulun, hahu nakfera makaas no monu barak tama ba mota laran.
(gui)
