DILI, STLNEWS.co – Orsamentu tinan 2023, governu aloka US$ 13 milhaun ba Autoridade Munisipiu Dili (AMD) atu halao programa neebe prioridade no fo benefisu ba povu no nasaun ida nee.
“Orsamentu ba programa tinan ida nee ami hetan US$ 13 milhaun,” dehan Prezidente Autoridade Munisipiu Dili (PAMD), Guilhermina Filomena Saldanha Ribeiro ba STL, Tersa nee (14/03/2023).
Nia dehan, US$ 13 milhaun nee iha 51% ba jestaun lixu, atividade foun neebe Autoridade Munisipiu Dili planu ona nomos ba merenda eskolar, depois iha 49% koloka ba iha diresaun sira seluk, hanesan apoiu ba administrasaun no area saude inklui mos ba agrikultura.
“Ita nia planu primeiru mak master plan Dili nian, neebe Ministeriu Planu Ordenamentu halao, ita hein bele loos ona, komesa hahu ona,” nia dehan.
Nia esplika, iha semana kotuk sira halo aprezentasaun final, iha dia 3 Fevereiru tinan 2023 iha CCD, no iha rekomendasaun balun sei hadia.
Nia esplika, planu sira seluk mak tenki kria infraestrutura sira neebe diak ba komunidade, hanesan bee moos.
“Ita nia komunidade sei kontinua halerik bee, tanba nee ita sei kolabora ho Bee Timor-Leste Empreza Publika (BTL, E.P.) mak haree ba asuntu bee nian,“ nia deklara.
Nia informa, AMD servisu hamutuk ho PNDS fo apoiu konaba oinsa lori bee nee mai besik ba komunidade, maibe tenki lao hamutuk ho BTL, E.P inklui haree ba estrada rural sira.
Iha fatin seluk, Akademista Universidade Nasional Timor Lorosae (UNTL), Camilo Ximenes Almeida dehan, sidade Dili oinsa mak atu moderniza, tenki apoiu husi autoridade lokal sira.
“Ita haree Autoridade Munisipiu Dili nia servisu seidauk bele moderniza sidade Dili sai sidade neebe diak, tanba hau sempre kestiona beibeik iha Hotel Timor nia oin, ema faan bibi no faan fahi, faan asu, fan manu, afinal Dili nee ema bolu sidade, no ita haree iha Kaikoli sorin ba Tribunal Rekurus nian oin, karau mos kesi hotu iha nee, koitadu ita atu halo oinsa, serake estadu fo orsamentu neebe boot maibe mudansa iha sidade Dili laiha,” nia esplika.
Nia koalia, ema faan sasan arbiru deit iha sidade Dili, AMD atu trata deit ida nee mos araska, maski orasamentu neebe koloka ba AMD nee montante boot.
Nunee mos komunidade Maria B Pereira esplika, orsamentu neebe montante boot, maibe kapital Dili sei sabraut, ema kontinua faan iha estrada publiku, tanba laiha kapasidade atu organiza Dili nee sai kapital ida neebe furak liu.
“Ita haree Dili sei sabraut, ema halo uma iha trotoar leten, ema halo uma iha foho lolon, ema halo uma iha mota ibun, ema soe lixu arbiru, AMD atu trata ida nee deit labele, maski ita nia governu koloka US$ 13 mil nee osan boot, mais seidauk reorganzia kapital Dili, tanba ita haree laiha kapasidade atu lidera sidade Dili,” nia afirma.
(jen)
