DILI, STLNEWS.co – Visi Ministru Administrasaun Estatal, Jacinto Rigoberto hatete, sidade Dili selebra nia loron ba dala 254, tanba nee governu hakarak sidade Dili sai furak, komunidade tenki hasae nia konsiensia hodi labele soe lixu arbiru, labele husik animal iha sidade Dili, no labele halo uma iha trotoar leten.
Nia dehan, dezenvolve sidade Dili sai sidade neebe reprezenta duni Timor Leste ba mundu internasional.
Ita hahu daudaun selebrasaun sidade Dili nian tinan ida nee, apela ba komunidade sira, hasae sira nia konsiensia preokupa ba ambiente, preokupa ba lixu. Sira neebe laiha servisu, fila ba foho para halo servisu. Ida nee mak ita nian preokupasaun boot,” dehan Visi Ministru Administrasaun Estatal, Jacinto Rigoberto ba STL iha AMD Kaikoli, Dili, Sesta (06/10/2023).
Nia informa, Ministeriu Estatal nia papel atu organiza sidade Dili moos husi lixu, moos husi animal sira ba mai, moos husi ema halo baraka oan iha trotoar leten.
Tanba nee, liga ba sidade Dili atu sai sidade neebe furak, nee papel integradu ministeriu hotu-hotu nian, liu-liu planeamentu ordenamentu teritoriu.
Ita hakarak sidade nee tenki halo planu integradu, no planu ida neebe mak bele halo sidade nee sai furak, maibe planu ida neebe sei lidera rasik husi Ministeriu Planu Dezenvolvimentu,” nia esplika.
Nia tenik, tanba planu nee laos investimentu neebe kiik, maibe presiza investimentu ida neebe boot.
Iha fatin hanesan, Presidente Autoridade Munisipiu Dili (PAMD), Guilhermina Filomena Saldanha Ribeiro esplika, atividade ohin ba selebrasaun loron sidade Dili nian hahu dader tuku 06:00, atividade marsa saudavel, no konsulta saude ba funsionariu hotu-hotu. Depois dada undian, nomos tuir mai sei misa agradesimentu nomos fo omajen ba luta nain sira neebe mate ona.
Sidade Dili ba dala atus rua lima nulu resin haat, tan nee tinan ida nee ita hakarak halo atividade boot, maibe munisipiu hotu-hotu hasoru hela pereparasaun ba iha ita nian kandidatura Lideransa Lokal sira, entaun ami limita deit halo atividade kiik oan,” nia tenik.
Atu hatudu ba komunidade iha sidade Dili katak, Dili nee tinan ba tinan aumenta ona idade, maibe atu halo mos reflesaun, Dili horiseik no Dili agora ho Dili ba oin,” nia deklara.
Nia hatutan, atividade neebe sira halao nee sei konsulta jeral ba funsionariu hotu-hotu neebe halao servisu iha AMD nian, nomos ba komunidade sira neebe hela besik iha edifisu Autoridade Munisipiu Dili, nunee mos funsionariu sira neebe nia edifisu besik hela iha area nee.
Nunee mos Komunidade Carlito Soares informa, loron sidade Dili monu iha dia 10 fulan Outubru 2023, nee ba atus rua lima nulu resin haat (254) transferensia husi Lifau Oe-Cosse mai iha Dili.
Sidade Dili kontinua nakonu ho foer, tanba nee ita husu ba govenru mos tenke plnau neebe diak atu dezenvolve diak nee furak iha ema nia matan, nia afirma.
(jen)
