DILI, STLNEWS.co – Oras nee daudaun Largo Lesidere nakfila ba fatin lixu, tanba lixu naklekar hela fatin-fatin, ida nee fo imajen la diak ba publiku inklui ba vizitante sira.
“Ita haree Largo Lesidere sai fatin lixu, tanba lixu naklekar iha fatin-fatin, nee fo imajen neebe la diak ba publiku nomos ba vizitante sira neebe mai tur iha fatin nee,” hatete Eduardo da Costa ba STL iha Largo Lesidere, Kuarta nee (15/03/2023).
Nia dehan, Largo Lesidere fatin turizmu no atrai ema barak vizita fatin nee, tanba fatin nee besik tasi ibun, maibe foer mak nakonu fali iha area nee.
“Fatin ida nee turizmu, bele atrai ita mai tur iha nee hodi halo tugas, tanba besik loos tasi ibun, maibe foer nakonu hanesan nee, dodok no dois, bele fo impaktu ba ita nian saude,” nia informa.
Nia rekomenda ba governu tenki rezolve problema lixu iha kapital Dili, tanba kapital Dili nee sidade numeru um iha Timor-Leste, maibe lixu naklekar iha fatin-fatin, liu-liu Largo Lesidere.
“Kapital Dili nee sidade, maibe lixu kontinua naklekar iha fatin-fatin, ita senti ladun diak, tanba fo imajen neebe la diak ba publiku, tanba nee governu tenki tau priorodade ba jesatun lixu iha kapital Dili,” nia tenik.
Iha fatin ketak, reprezentante povu iha Uma Fukun Parlamentu (PN) husi Bankada FRETILIN, Lidia Norberta esplika, konaba lixu iha kapital Dili, sei bele Autoridade Munisipiu Dili (AMD) ho MAE tenki esklareza servisu nee ho diak.
“Mazmu kareta raut lixu nee AMD mak halo kontratu, maibe ami nia intervensaun nee ba tinan oin AMD halo akizasaun kareta sira tenki ho kondisaun diak para hodi tula lixu, laos kompanhia sira nia kareta baibain depois fakar tui-tuir dalan, estrada mak sai fali fatin lixu,” nia esplika.
Nunee mos Prezidente Autoridade Munisipiu Dili (PAMD), Guilhermina Filomena Saldanha Ribeiro informa, AMD sempre preokupa lixu sira iha kapital Dili, liu-liu iha Komoro nian nee loron-loron lixu nakonu, nee tanba komunidade soe lixu la tuir orariu neebe governu fo.
“Ita sempre avizu no fo hatene katak, labele soe lixu arbiru, tenki seo lixu tuir orariu neebe ita fo sai, maibe sira lakohi tuir ida nee, sira soe lixu iha meudia, entaun kareta tula foer dala tolu ou haat, rai komesa kalan ona,” nia afirma.
(jen)
