DILI, STLNEWS.co – Oras nee daudaun lixu kontinua nakonu iha Largo Lesidere, tanba ekipa Servisu de Agua e Saneamento (SAS) la dasa hahu husi loron Sesta, Sabadu, no mos Domingu.
“Ekipa SAS too tuku 10:00 Otl mak foin mai dasa, depois ita haree oras 12:00 sira ba deskansa ona. Seidauk raut foer, oras too ona sira fila ba uma, tanba nee foer sei kontinua nakonu,” hatete negosinte, Elsa do Carmo iha Largo Lesidere ba STL, Segunda nee (25/07/2022).
Nia dehan, ekipa SAS sira mai dasa foer nee tarde, tuku 10:00 hanesan mak foin mai dasa foer, tanba nee seidauk dasa no seidauk raut hotu oras 12:00 sira fila ona ba uma.
Nunee mos negosiante, Lindo Fernandes katak, nia mos mai faan nuu laloir iha fatin nee, maibe sira nia nuu kulit soe iha fatin lixu.
“Ami soe duni iha lixu fatin, komu ita nia SAS too loron haat hanesan nee mos la mai raut, entaun ita soe tan butuk hamutuk sai barak, hafoin iha dader mak SAS mai raut,“ nia koalia.
Iha fatin hanesan, Carmelita Souza Moniz nudar ekipa SAS informa, sira dadersan mai ona, maibe sira sei dasa husi ponte B.J. Habibie nian, tesik mai Largo Lesidere nee dook, tanba nee molok too iha Largo tuku 10:00 ou 11:00.
(jen)
