Lixu Kontinua Nakonu Iha Lesidere

DILI, STLNEWS.co – Oras nee daudaun lixu kontinua nakonu jardin Largo Lesidere, fatin neebe loron no kalan ema barak halibur ba.

“Jardin Largo Lesidere fatin neebe ema loron kalan mai tuur hodi refreshing kakutak ou buka anin fresku, maibe agora nakonu ho foer,” dehan joven Julia Ximenes ba STL iha Largo Lesidere, Tersa nee (13/06/2023).

Nia dehan, Largo Lesidere fatin neebe importante ba komunidade hodi mai tuur halimar iha fatin nee, tanba fatin nee fresku no besik tasi ibun, maibe agora nakonu ho feor.

“Largo sai fatin neebe hakmatek, no fatin neebe fresku, maibe ita haree nakonu ho lixu, ita tuur mos la diak, tanba nee husu ba Servisu Aqua no Saneamentu (SAS) tenki limpeza ho diak, atu nunee fatin nee moos nafatin,” nia esplika.

Iha fatin hanesan, Komunidade Julio da Costa Souza informa, Largo Lesidere nee fatin neebe iha Kapital Dili, maibe oras nee foer nakonu no nuu kulit fakar iha fatin–fatin.

“Ita haree foer nakonu iha Largo Lesidere, ida nee fo imajen neebe la diak ba ita nia povu no ba nasaun sira seluk neebe oras nee nia ema servisu hamutuk ho ita, tanba nee husu ba governu, jardin sira nee tenki hamoos,” nia informa.

Entretantu, Xefi Departamentu Saneamentu Munisipiu Dili, Domingos dos Santos Soriano esplika, Servisu Aqua no Saneamentu (SAS) esforsu makaas hodi raut foer iha kapital Dili, maibe oras mak la too, tanba dala ruma komunidade soe lixu arbiru deit iha dalan ninin sira nee, nunee fo impaktu ba SAS la konsege raut hotu.

“Lixu sira neebe iha kapital Dili nian volume barak demais, tanba nee seidauk raut hotu kalan ona, liu–liu iha jardin sira neebe negosiente sira faan ba, nee sira soe nuu kulit nee mos arbiru, ita raut seidauk hotu kalan ona,” nia afirma.

(jen)

LEAVE A REPLY

Please enter your comment!
Please enter your name here