PN Husu PAMD Kontrola Komunidade Halo Uma

DILI, STLNEWS.co – Parlamentu Nasional (PN) husu Prezidente Autoridade Munisipiu Dili (PAMD) tenki kontrola komunidade sira neebe halo uma iha tasi ibun, tanba sira kontinua halo uma iha fatin neebe risku ba vida.

“Hau husu ba PAMD atu kontrola sidadaun sira neebe hela iha Dili, liu-liu iha tasi tolu, nomos tasi ibun area hotel Dili Arbiru beat,” dehan reprezentante povu iha Uma Fukun Parlamentu Nasional (PN), Deputadu Bankada CNRT, Marcos Xavier liu husi sesaun plenaria iha PN, Tersa nee (25/04/2023).

Nia dehan, komunidade sira neebe mak faan sasan iha tasi tolu, liu-liu tasi ibun sira nee, tanba primeiru sira halo uluk baraka depois neineik ba neineik sira komesa halo uma stenga tebok no hela matin iha neeba.

Nia esplika, uluk uma iha ida ou rua deit mak iha neeba, maibe agora tasi ibun nee nakonu ho uma, tanba nee govenru liu husi PAMD tenki kontrola no fo atensaun ba komunidade sira atu labele halo uma iha area neebe risku.

Deputadu nee husu ba PAMD no Prezidnete Estatal atu haree asuntu sira hanesan nee, tanba ema halo uma iha tasi ibun no mota laran, ida nee fo amenasa ba sira nia vida.

Iha fatin ketak, Sekretariu Estadu Protesaun Sivil (SEPS) Joaquim Jose Gusmao dos Reis Martins dehan, APC bele fo hanoin no hakbesik nafatin ba sira atu labele harii uma iha fatin neebe risku ba dezastre naturais.

“Ita bele fo hanoin nafatin ba komunidade sira neebe kontinua halo uma iha foho lolon, maibe atu hapara, APC seidauk bele halo ida nee,“ nia dehan.

Nia informa, kuandu atu hapara sira halo uma iha foho lo-loon no mota laran nee sei iha ekipa konjunta ida, interna ministerial ida neebe mak sei tomak konta ba ida nee, fatin ida neebe mak bele harii uma no labele harii uma.

Nia afirma, iha ekipa ida mak sei lao hela hodi identifika hela fatin neebe mak labele halo uma no bele halo uma, nomos fo ona xamada atensaun ba sira neebe halo uma risku ba dezastre naturais.

(jen)

LEAVE A REPLY

Please enter your comment!
Please enter your name here