Tenki Foti Asaun Rigor Ba Komunidade Harii Uma Iha Foho Leten

DILI, STLNEWS.co – Governu liu husi Ministeriu Obras Publika (MOP) no Sekretaria Estadu Terras e Propriedade, tenki kontrola no foti asaun rigor ba komunidade sira neebe halo uma iha foho lolon.

“Ita nia governu tenki foti asaun rigor ba ita nia komunidade sira neebe halo uma permanenti iha foho leten, tanba tempu udan bee lori rai ten tun taka bee dalan sira automatikamente hamosu inundasaun iha sidade laran,” hatete Xefi Suku Kaikoli, Postu Administrativu Vera Cruz, Munisipiu Dili, Hipolito Marques Sarmento ba STL iha nia knaar fatin sede Suku Kaikoli, Kinta (01/02/2024).

Nia tenik, kontenti ema barak iha ona kapasidade ekonomia harii uma ho kategoria permanenti, maibe labele kee fali foho leten sira fo risku ba ema barak kuandu tempu udan monu rai.

“Ami dala ruma koalia sira la rona, ami ba hatete iha loron, sira halo uma nee iha kalan, liu semana ida deit uma mutin sae ona no ema hela iha laran ona,” nia esplika.

Nia deklara, papel Ministeriu Obras Públika nian atu kontrola foho leten sira nee bele harii uma ga lae no Sekretariu Estadu Terras Propriedade haree estatutu rai foho leten sira, tanba foho leten sira husi Bekora too Tasi Tolu uma nakonu ona no uma sira nee maioria permanenti.

“Ita boot sira bele haree Kaikoli nee foer iha neebe, agora Kaikoli nee moos. Maibe kuandu udan boot bee halai ona ema iha foho leten mos komesa soe ona karon, ropa aat, aitahan, plastiku sira mai hotu para fatin mak Kaikoli, liu-liu Tribunal Rekursu no justisa nia oin la ba fatin seluk,” nia informa.

(jen)

LEAVE A REPLY

Please enter your comment!
Please enter your name here