DILI, STLNEWS.co – Ohin ezame primeiru periodu ba loron daruak nian, maibe transporte publiku greve tanba kombustivel folin sae. Situasaun nee prejudika tebes ba estudante balu neebe hela dook labele tuir ezame.
Kestaun nee hatoo husi Diretor Eskola Ensinu Baziku Sentral 30 de Agostu Komoro, Filomeno Salsinha ba STL iha knaar fatin, Tersa nee (26/04/2022).
Nia dehan, transporte publiku la movimentu prejudika estudante sira atu mai lalais eskola, tanba ohin ezame daruak primeiru periodu nian, entaun tenki hein estudante sira kuaze oras hafoin hahu ezame.
“Ami hatene katak ezame loron primeiru lao diak, maibe loron segundu iha problema, tanba transporte publiku greve, ita sei haree medida saida ita halo, tenki identifika estudante nunee buka solusaun diak ba sira,” dehan nia.
Nia relata, estudante ida ka rua mak tuir ezame, tanba moras balu seidauk iha razaun, maibe estudante horiseik mai tuir ezame, maibe ohin la mai signifika sira difikuldade ba transporte publiku, se transporte publiku la halo movimentu, nee kondisaun global ba Dili laran tomak.
Tuir observasaun jornalista iha Komoro, relasiona ho transporte publiku greve ohin loron estudante neebe tuir ezame tama meudia nian, lao ain ba eskola, nunee tuir ezame maski atraza, maibe sira esforsu too iha eskola hodi tuir ezame.
Relasiona ho asuntu nee, jornalista koko atu intervista Diretor Edukasaun Munisipiu Dili, Carlito da Silva, maibe la iha fatin tanba okupadu.
(joa)
