Aban Fo Sai Rezultadu Ezame Nasional, SEM Dili Enkontru Ho Diretor Eskola Sira

DILI, STLNEWS.co – Ohin Servisu Edukasaun Munispiu (SEM) Dili halao enkontru ho diretor eskola publiku, privadu no katolika, hodi koalia konaba aban eskola idak-idak sei fo sai rezultadu ezame nasional ba estudante sira.

Lia hirak nee hatoo husi Diretor Servisu Edukasaun Munisipiu Dili, Carlito da Silva ba STL, Kuarta nee (13/12/2023).

“Agora daudaun ami atu halao ona enkontru, hodi koalia konaba preparasaun ba aban nian atu fahe rezultadu nee. Ami halo enkontru ho ita nian diretor eskola husi nivel ensinu baziku, sekundariu no tekvo, tantu publiku, privadu no katoliku, ami sei fo informasaun para aban nee bele servisu hamutuk ho polisia, hodi fahe rezultadu sira nee,” nia afirma.

Carlito dehan, sira halo enkontru ho diretor eskola sira iha Munisipiu Dili, para koalia konaba aban atu fo sai rezultadu ezame nasional ba eskola sira, entaun ohin bele realiza enkontru ida nee.

“Nee duni ba aban nee ita koalia ho ita nian diretor eskola sira, ho nunee fahe rezultadu ida nee ba ita nian estudante sira, tanba horiseik husi parte ministeriu nian anunsia tiha ona rezultadu ida nee,” dehan Carlito.

Nunee mos Diretor SEM Manatuto, Graciano de Jesus Baptista hatete, sira sei okupadu hela ba enkontru ho direjente eskola sira, liga ho atu fahe rezultadu ezame nasional ba estudante sira iha eskola.

“Ami okupadu hela, tanba atu halo enkontru ho direjente eskola sira, liga ho atu fo sai rezultadu ezame nasional ninia,” nia haktuir.

Nunee mos Diretor ESJ no 4 Setembru Balide, Martinho de Menezes dehan, agora daudaun iha hela edukasaun Munisipiu Dili, tanba sira atu halo enkontru ho diretor eskola, nee duni daudaun nee okupadu hela no too agora sira seidauk simu estudantes foun.

“Agora daudaun ami halo enkontru iha edukasaun Munisipiu Dili, neebe ami sei okupadu hela ho enkontru,” dehan nia.

(jac)

LEAVE A REPLY

Please enter your comment!
Please enter your name here