DILI, STLNEWS.co – Daudaun nee merenda eskolar seidauk lao iha eskola sira, no merenda nee sei implementa iha fulan Abril nian laran.
Haktuir Diretor SEM Likisa, Carlos Lopes husi Munisipiu Likisa ba STL liu husi telefone, Tersa nee (21/03/2023).
“Ho administrador atu ba asina kontratu tau kode vendor, purtantu horiseik sira manda ona ba Ministru Administrasaun Estatal (MAE), depois horiseik parte husi finansas nian foti asina ona kontratu ho ekipa jestaun ba programa, ami nee sai hanesan monitoring deit. Ita fornese dadus deit, responsabilidade masimu nee MAE, konta bankaria nee hotu ona, hein kode vendor nee mai asina kontratu, para hodi halo prosesa orsamentu,” nia esplika.
Nia dehan, bainhira kode vendor nee mai mak asina kontratu, tanba nee programa merenda eskolar seidauk lao, maibe dia 1 fulan Abril bele implementa ona programa merenda eskolar, estudantes neebe atu asesu merenda eskolar ba tinan ida nee hamutuk 19.628.
Iha parte seluk, Diretor SEM Vikeke, Domingos Brandao dehan, agora daudaun prepara hela dadus atu aprejenta ba iha MAE no submete ona para bele rejistu kode vendor, no sei implementa merenda eskolar iha fulan Abril nia laran.
“Eskola hamutuk 137, maibe too agora programa merenda eskolar nee seidauk lao iha eskola sira, no ami nian estudantes sira seidauk asesu programa nee, tanba tinan ida nee too agora programa nee seidauk lao iha eskola sira,” nia informa.
(jac)