DILI, STLNEWS.co – Bainhira Timor Leste (TL) adere ba iha ASEAN, Ministeriu Edukasaun sempre preparadu para bele kompete iha rejional.
Haktuir Dretor Jeral Administrasaun Jestaun no Finansas husi Ministeriu Edukasaun, Antoninho Pires ba jornalista sira iha Vila Verde, Tersa nee (22/08/2023).
“Sistema edukasaun nee konsidera iha kurikulu sistema edukativu iha nibvel rejional ASEAN nian. Ita nia kurikulu rejional nee adopta ona balun, neebe ita atu adere ba ASEAN nee ita prontu, tanba ita nia materia sira neebe ita konsidera tama ona ba rejional,” dehan nia.
Tuir Antoninho, atu adere ba ASEAN Timor-Leste preparadu ona, tanba sistema edukativu no materia sira nee tama ona ba kurikulu rejional, presiza iha nivel internasional no ba rejional. Entaun Ministeriu Edukasaun preparadu nafatin para atu bele adere ba iha ASEAN.
Nia afirma, atu hadia buat balun nee laiha, tanba bele halo ajustamentu hodi haree ba kurikulu, evaluasaun, implementasaun kurikulu ba parte balun neebe iha rejional ninian. Tanba atu adere ba ASEAN iha parte balun sei koalia konaba sidadania, por ezemplu ba kurikulu siklu 21 nian. Tanba kurikulu siklu 21 nee uza iha mundu. Konaba dizitalizasaun, prosesu aprendizajen hodi bele adere ba ASEAN.
Iha fatin seluk, Ministru Superior Siensia no Kultura (MESKK), Jose Honorio da Costa Pereira Jeronimo hatete, tenki hadia lei baze ensinu superior, hodi nunee bele kompete ho nasaun sira rejional, oinsa hadia diak liu tan iha parte edukasaun nian, nee importante tebes, oinsa servisu hamutuk ho SEFOPE para bele haree sira nian treinamentu sira nee, atu bele hetan sistema kualifikasaun.
“MESKK iha 23 programa, primeiru mak hadia lei baze ensinu superior, para ita nian kursu sira nee laos ba diploma 2, maibe ba diploma 3,4 no ba tekniku profesional sira bele ba mastradu, nunee ita bele kompete rejiaun nee, se ita ho ita nian kursu agora diploma 2, ita labele ona kompete iha rejiaun ASEAN, tanba ema konsidera nafatin ita hanesan laiha skil, tanba nee sistema kualifikasaun sei lao diak,” nia komenta.
Nunee mos Diretor Ezekutivu ANAAA, Nilton Paiva dehan, koalia adere ba ASEAN, koalia konaba rekursu umanu, prontu ka la prontu nee fila-fali ba kada universidade, maibe oinsa atu prepara aan, tanba ANAAA nia papel ba haree kualidade nee too iha neebe, tanba Timor oan barak mak matenek atu kompete iha ASEAN nee bele.
(jac)
