ANAAA Finaliza Ona Prosesu Moderasaun

DILI, STLNEWS.co – Ajensia Nasional Avaliasaun Akreditasaun Akademika (ANAAA) finaliza ona prosesu moderasaun.

Lia hirak nee hatoo husi Diretor Ezekutivu ANAAA, Nilton Paiva ba STL iha nia knaar fatin, Kinta nee (18/01/2024).

“Agora daudaun ekipa teknik ANAAA finaliza ona prosesu moderasaun no diretor ezekutivu ANAAA sei aprezenta ba Konselhu Diretivu ANAAA, nee duni iha inisiu fulan Fevereiru no diretor ezekutivu ANAAA mos sei relata rezultadu akreditasaun 2023 ba ministru ensinu superior antes publika ba ensinu superior sira neebe hetan avaliasaun no akreditasaun iha tinan 2023,” dehan nia.

Nilton hatete, prosesu hotu sei anunsiu iha fulan Fevereiru 2024, tinan ida nee ANAAA halo avaliasaun no akreditasaun ba universidade no instituisaun 8 neebe eziste iha Timor laran mak hanesan UNPAZ, UNDIL, UNITAL, DIT, IOB, ISC, ETCI ermera, ICFP Baucau. No ANAAA mos halo avaliasaun no akreditasaun ba instituisaun ida mak IBTL Manufahi, Same.

Iha fatin seluk, Reitor Institute Superior Cristal, Sebastiao Perreira dehan, iha tinan kotuk ANAAA halao ona avaliasaun akreditasaun ba instituisaun ensinu superior sira iha rai laran, maibe ninia rezultadu nee rasik ANAAA seidauk fo sai ba ensinu superior, maibe ida nee sira nian kompetensia, husi universidade hein deit bainhira mak sei fo sai rezultadu ida nee.

“Hau hanoin iha tinan kotuk ANAAA halao ona avaliasaun akreditasaun ba instituisaun ensinu superior sira iha rai laran, maibe ninia rezultadu nee rasik ANAAA seidauk fo sai ba ensinu superior, maibe ida nee sira nian kompetensia, husi universidade hein deit bainhira mak sei fo sai rezultadu ida nee,” nia afirma.

(jac)

LEAVE A REPLY

Please enter your comment!
Please enter your name here