DILI, STLNEWS.co – Eskola idak-idak iha kurríkulu desportu ninia, Ministeriu Edukasaun (ME) liu husi Diresaun Edukasaun Inkluzivu apoiu tan deit material ba atividades desportu neebe halao tiha ona.
Lia hirak nee hatoo husi Diretor Nasional Asaun Sosial Eskolar, Joaquim Martins ba STL iha nia knaar fatin, Kuarta nee (11/10/2023).
“Diresaun Nasional Edukasaun Inkluzivu iha papel importante ida mak haree ba iha desportu eskolar, tanba nee atividades neebe mak ita bele halo nee mak liu-liu husi ministeriu, ita halao kompetisaun entre eskola sira, tanba nee planu iha tempu badak sei halo kompetisaun ba nivel ensinu baziku iha Munisipiu Ainaro, no Munisipiu Likisa, maibe nee iha planu ona. Fulan oin ita foin hetan apoiu husi ministra para bele kria desportu eskolar, liu-liu munisipiu rua, Ainaro no Likisa,”nia haktuir.
Nia dehan, desportu eskolar laos kompetisaun mak halao, maibe eskola ida-idak iha kurrikulu desportu ninia, entaun sira halao atividades ida nee tuir kurikulu neebe iha, tanba nee husi ME liu husi diresaun edukaun inkluzivu apoiu tan deit material ba atividades neebe mak halao tiha ona.
Iha fatin seluk,Diretor EBC Bidau-Akadiru-hun, Roberto Cristovao Jeronimo hatete, profesores ba materia desportu nia nee iha, no estudante sira sempre halao atividades desportu, nee tama iha atividades ekstra kurikuler ida.
“Ami nia estudante sira sempre halao atividades desportu eskolar, tanba ida nee hanesan atividades ekstra ida ba ita nian estudante sira,” nia afirma.
Entretantu, Diretor SEM Vikeke, Domingos Brandao afirma, konaba atividade desportu nee husi eskola idak-idak mak organiza ou halo atividades ida nee, para organiza estudante sira bele halo atividades refere.
(jac)
