DILI, STLNEWS.co – Ensinu Tekniku Vokasional (ESTV) laiha ekipamentus pratika iha area espesialidade ba estudante sira iha eskola.
“ESTV maioria halao ensinu no aprendizajen ho natureza hanesan deit ho ensinu no aprendizajen iha eskola sekundaria Jerais. ESTV neebe lo-loos atu fornese no transmite konhesimentu tekniku ba estudante sira la konsege kumpri sira nia misaun, tanba fundamentu hanesan tuir mai. ESTV sira la iha ekipamentu pratika relevante tuir departementu area espesialidade neebe eskola oferese,” dehan Diretor Ezekutivu TLCE, Jose Monteiro ba STL, Segunda nee (20/11/2023).
Nia dehan, profesores neebe hanorin maioria seidauk iha kualifikasaun teknika no barak mak formadu iha siensia sosiais, liu liu iha eskola sira neebe konverte husi ESJ ba fali ESTV, profesores la hetan sertifikasaun tekniku husi INDIMO.
“Estudante maioria husi ESTV lakon tempu no la hetan aprendizajen kualidade no sai vitima, tanba politika edukativas nebee la orientadu, informasaun hirak nee hotu TLCE hetan iha estudu avaliativu AUDITORIA SOSIAL nebee TLCE halao iha 2021, iha ESTV publika hotu-hotu iha Timor Leste tomak,” nia dehan.
Iha fatin seluk, Diretor SEM Manufahi, Trinito Sarmento afirma, tekvo sira nee sei menus ekipamentus neebe estudante sira uza atu halo pratika, tanba iha tekvo estudante sira simu teoria, depois halo mos pratika.
“Bainhira laiha ekipamentus, nee oinsa mak ita nian estudante sira bele halo pratika iha eskola tekvo, ita presiza kria kondisaun neebe diak no prepara fasilidade ba ita nian estudante sira hodi uza halo pratika,” nia haktuir.
(jac)
