DILI, STLNEWS.co – Atu asegura ezame segundu periodu neebe sei halao iha loron Segunda (08/08/2022)), husu ba membru Polisia Nasional Timor Leste (PNTL) atu halo kontrolu ou fo seguransa iha area Eskola Sekundariu Jeral 12 de Novembru no ESJ 5 de Maio Becora.
Haktuir Adjuntu Diretor ESJ 12 de Novembru, Kanosius Elu, ba jornalista sira iha nia knaar fatin Becora, Dili, Sesta nee (05/08/2022).
“Atu koalia ho komandante meus oinsa mak parte seguransa no eskola foti atu bele asegura prosesu ezame II periodu iha loron segunda, ba oin nee bele lao ho normal, ami nian hakarak Segunda ba too loron Sabadu atu tau pesoal polisia balun iha nee para halo kontrolu, nunee ezame bele lao diak,” afirma nia.
Nia dehan, konaba preparasaun ba ezame II periodu, buat hotu prepara ona, estudantes barak liu, sira fahe ba turnu rua, dader no loraik, sala 39, total estudantes neebe sei halao ezame nee novecentos vinte oito (900.028) mil, profesores kontratu nain hitu (7), permanente nain lima nulu (50), volontariu sanolu resin hitu (17).
Iha fatin hanesan, Prezidente Komisaun Organizador ba ezame II periodu, Juliao Filipe Freitas dehan, ezame II periodu sei halao iha loron 8-13 fulan Agostu, preparasaun sira simu orientasaun husi munisipiu katak, ezame bazeia ba kalendariu, ba estudantes neebe tama dader nafatin tama dader, loraik mos hanesan, tanba bazea ba kondisaun neebe iha.
“Ami mos orienta estudante sira prepara estuda, bazea ba orariu neebe mak komisaun fo sai ona, konaba regulamentu ami fo orientasaun ba estudantes, tenki displina, uniforme eskola ninia ami husu estudantes hatais tuir loron neebe mak determina husi eskola,” dehan nia.
(jac)
