DILI, STLNEWS.co – Maski profesores 98 husi Munisipiu Lautem asina ona kontratu, maibe too ohin loron sira seidauk simu salariu.
Tuir Diretor Servisu Edukasaun Munisipiu Lautem, Rui Manuel Miranda da Costa Branco katak, profesores voluntariu neebe foin lalais asina kontratu ba profesor sira kontratadu hamutuk 98, sira nia salariu too agora seidauk simu.
“Tanba nee, husu ba Ministeriu Edukasaun foun atu atensaun ba sira neebe asina kontratu maibe la simu osan. Hau fiar katak publikasaun ona iha jornal republika, maibe too agora sira seidauk simu salariu, espera governu foun nee bele rezolve sira nia problema,” dehan Rui ba STL liu husi telefone, Kuarta nee (12/07/2023).
Iha fatin seluk, programa Outricks iha AJAR, Inocencio de Jesus Xavier hateten, iha kestaun rua, se mak halo rekrutamentu nee Ministeriu Edukasaun. Sosiedade Sivil AJAR husu ba Komisaun Funsaun publiku (KPF) tenki servisu iha fundamentu hodi selu ba profesor kontratadu sira, kuandu iha razaun ruma bele konfirma fali ba iha Ministeriu Edukasaun atu halo pagamentu ba sira.
“Tanba Ministeriu Edukasaun halo rekrutamentu bazeia ba nesesidade eskola sira neebe menus profesores. Bainhira profesores kumpri ona sira nia dever hanorin ona, estadu iha obrigasaun atu halo pagamentu. Se KFP la aseita ida nee, KPF tenki aprezenta razaun fundamentu ba iha Ministeriu Edukasaun, neebe sira la simu desizaun husi Ministeriu Edukasaun nian,” tenik nia.
Nia dehan, tanba saida mak Ministeriu Edukasaun lista profesores kontratu ba iha KFP, nee tama iha kompetensia ajente administrasaun publika, agora iha kestaun nesesariu neebe mak iha desizaun emerjensia ruma. Funsaun publiku halo rekrutamentu por nesesidade liga ho eskola neebe menus profesores sira.
Iha fatin seluk, bainhira jornalista tenta atu halo intervista ho Prezidente Komisaun Funsaun Publik, Faustino Cardoso, maibe la konsege tanba halo viajen ba Maliana.
(jac)
