DILI, STLNEWS.co – Servisu Edukasaun Munisipiu Vikeke simu ona sirkular husi ministeriu, no orienta ona diretor eskola hotu iha Munisipiu Vikeke, durante kampanha labele abandona servisu.
Kestaun nee hatoo husi Diretor Edukasaun Munisipiu Vikeke, Domingos Brandao ba STL liu husi telefone, Sabadu nee (08/04/2023).
“Ami orienta ona ami nian profesor sira, tanba ami mos simu ona sirkular ida husi ami nian ministeriu katak, durante tinan politika nee husu ba profesores no direjente sira labele abandona servisu, maibe sirkular husi ministeriu mos ami hatoo ona ba ita nian profesor sira, ho nunee labele abandona aprendizajen iha atividades kampanha nia laran,” nia esplika.
Domingos dehan, bainhira fora husi oras servisu, nee depende ba sira, maibe iha oras servisu ninia nee labele no laiha profesores atu abandona ninia servisu.
“Konaba ida sirkular, diretor jeral ensinu haruka ona mai, tanba sirkular nee rasik despaisu husi ministru, ami hatoo ona ba diretor grau hotu iha Munisipiu Vikeke atu labele abandona servisu ba partisipa iha kamapnha,” tenik nia.
Nia sublinha, oras servisu nian laiha profesor no estudantes partisipa iha atividades kampanha ninia, no sira avizu ona ba fatin kampanha neebe mak besik hela eskola, husu profesores labele abandona eskola.
(jac)
