DILI, STLNEWS.co – Benefisiáriu bolsa meritu husi eskola sira iha Munisipiu Vikeke hamutuk 200 resin lakohi trata dokumentus, hodi hetan konta bankaria husi Banco Nacional de Comércio de Timor-Leste (BNCTL) para bele asesu ba bolsa refere.
Lia hirak nee hatoo husi Diretor Servisu Edukasaun Munisipal Vikeke, Domingos Brandao katak, benefisiáriu laiha konta bankaria tanba sira mak lakohi trata sira nian dokumentus, para bele asesu ba bolsa ida nee.
“Hau hanoin ita nian benefisiáriu bolsu meritu hamutuk 200 resin mak lakohi trata sira nian dokumentus, hodi asesu ba programa ida nee, maski durante nee ita sempre fo sai avizu ba sira, maibe nain rasik lakohi trata dokumentus, agora benefisiáriu neebe trata ona dokumentus para hetan konta bankaria nee hamutuk 800 resin hodi asesu ba bolsa refere,” dehan Domingos ba STL liu husi telefone, Tersa nee (25/07/2023).
Tanba tuir Brandao katak, benefisiáriu ida rua mak sira nian konta bankaria sala, tanba balun ninia BI ho deklarasaun la apar malu, no balun sira nian apalidu mak sala, entaun husi BNCTL haruka fila dokumentus sira nee, maibe sira nain mai iha munisipiu para foti fali deklarasaun hodi hadia ona dokumentus sira nee.
“Ami sempre iha kooperasaun neebe mak diak ho ita nian BNCTL, karik iha falhansu ruma ami bele komunika ba malu, neebe ami nian kooperasaun ho banku lao diak hela, ida rua neebe dokumentus sala ami rezolve ona,” nia esplika.
Iha parte seluk, Diretor EBC Fatumeta, Feliciano da Costa Gusmao dehan, konaba benefisiáriu bolsa meritu, iha fulan rua liu ba nain haat mak haruka sira atu ba trata dokumentus iha edukasaun munisipiu.
“Husi ami nian sentral ho EBF Naroman ninia dokumentus kompleta ona, maibe husi EBF Fatumeta nain rua no EBF Bairo Pite nain haat mak daudaun nee sei trata hela dokumentus iha ita nian Edukasaun Munisipal Dili,” tenik nia.
Nunee mos Diretor SEM Likisa, Carlos Lopes dehan, konaba asuntu benifisiariu bolsa meritu nee, hanesan baibain dehan ona, balun iha ona konta bankaria no balun seidauk, maibe daudaun nee sei enkontru hela ho ministra iha Infordepe.
“Agora daudaun ami halao hela ruuniaun ho ministra iha Infordepe, konaba asuntu nee hau dehan ona, ita nian benefisiáriu balun iha ona konta no balun seidauk,” nia afirma.
(jac)
