DILI, STLNEWS.co – Ministeriu Edukasaun labele trata benefisiáriu bolsa meritu sira nian dokumentus, no sira idak-idak tenki ba trata iha banku, tanba benefisiáriu rihun 5 too agora seidauk iha konta bankaria.
Tuir Diretor Jeral Administrasaun Jestaun no Finansas husi Ministeriu Edukasaun, Antoninho Pires dehan, husi ministeriu halo prosesu hotu ona. Agora iha banku mak hanesan baibain hatete ona katak, atu halo pagamentu nee presiza liu mak benefisiáriu sira nian konta bankaria neebe sertifika ona husi ministeriu. Ezemplu konta bankaria neebe husi banku hatama mai iha ministeriu, depois husi ministeriu sertifika katak, konta bankaria husi labarik ninia ou keta husi ema seluk ninia.
“Husi ministeriu too ohin relatoriu hatoo ona ba banku para bele halo pagamentu, iha semana kotuk ba nee ami foin kompleta dokumentus. Inprinsipiu ministeriu hatur ona iha manual nee katak, osan nee labele ba iha ema seluk, maibe tenki ba los iha benefisiáriu nee tuir manual neebe aprovadu, katak tenki liu husi konta bankaria propria ba ema neebe asesu ba bolsa ida nee,” dehan Pires ba jornalista, Segunda nee (10/07/2023).
Pires hatutan, ezemplu ida, se karik labarik nee ninia naran la los, nee banku labele simu, no osan nee la tama ba konta bankaria. Osan nee sei fila ba kofre estadu, benefisiáriu atu hetan konta bankaria, nee banku iha kriteriu mak tenki iha sertidaun RDTL, eleitoral no Bilheti Identidade, dokumentus nee Ministeriu Edukasaun labele trata, tanba sertidaun nee nain mak tenki trata, tanba loke konta bankaria nee nain tenki asina.
“Total benefisiáriu hamutuk rihun 13, maibe rihun 8 iha ona konta bankaria, no rihun 5 seidauk iha konta bankaria. Ami fo sai ona dala tolu, tanba uluk too fulan Maiu nia laran tenki hotu ona, ami adia ba too Junhu mos la hotu too ohin loron,” katak nia.
(jac)
