DIT-UNWIRA Kupang Halo Peskiza Ba Rai Halai No Inundasaun Iha Dili

DILI, STLNEWS.co – Estudante Fakuldade Enjinaria Universidade Katolika Widya Mandira (UNWIRA) Kupang, Indonezia ho estudante School of Engineering and Science Dili Institute of Technoloy (DIT) halao Kuliah Kerja Nyata (KKN) Tematic Internasional 2024 durante semana ida (22-28 Janeiru 2024) iha Dili no Fronteira Batugade-Mota Ain.

KKN Tematic Internasional 2024 entre estudante Fakuldade Enjinaria Universidade Katolika Widya Mandira Kupang ho estudante School of Engineering and Science DIT, loke husi Pro-Reitor Planu ho Kooperasaun DIT, Marcos Taec Abi, MA, reprezenta Reitor DIT, Dr. Salustiano dos Reis Piedade, iha Knua DIT, Dili, Segunda (22/1/2024).

Pro-Reitor Planu ho Kooperasaun DIT, Marcos Taec Abi, MA, hatete KKN Tematic no Community Engagement Internasional 2024 ho Tema “Engineering and Technology for Humanity”, We Build Together nee realiza  hosi servisu hamutuk entre Fakuldade Tekniku DIT no UNWIRA Kupang.

“Atividade ida nee laos foin realiza, maibe kontinuasaun atividade neebe halo tiha ona husi kooperasaun universidade rua. Nasaun ho nasaun iha fronteira, maibe ba edukasaun laiha fronteira. Estudande sira mak tenke prepara mentalidade atu tuir prosesu aprendizajen,” katak Marcos.

Nia hato’o agradese wain ba Embaixada Republika Indonezia (KBRI) Dili  liu husi Adidu Edukasaun no Kultura neebe sempre fo apoiu moral ba servisu hamutuk universidade sira iha Timor Leste ho universidade iha Indonezia.

“Obrigado ba Adidu Edukasaun KBRI Dili, Prof. Dr. Ikhfan Haris neebe ohin marka prezensa iha  seremonia abertura  KKN Tematic Internasional 2024 entre estudante Fakuldade Enjinaria Universidade Katolika  Widya Mandira Kupang ho estudante School of Engineering and Science DIT,” hatete Marcos.

Pro-Reitor Planu ho Kooperasaun DIT nee mos hatete katak liu husi atividade KKN Tematic Internasional 2024 nee bele hetan rezultadu neebe diak  atu hadia no sustenta relasaun institusional entre universidade rua iha implementasaun atividade edukasaun, peskiza no dezenvolvimentu rekursu umanu no mos  servisu ba komunidade ho nuansa sabedoria lokal.

Iha fatin hanesan, Prezidente Konselhu Permanente DIT, Dr. Estanislau Saldanha hatete, kooperasaun entre DIT-UNWIRA halao kleur ona no to’o agora institusaun edukasaun superior rua nee  nafatin iha komitmentu atu kontinua implementa programa-programa hanesan atividade edukasaun, peskiza no sel-seluk tan.

“Edukasaun laiha fronteira no kooperasaun nee nafatin lao ba oin, atu dezenvolve rekursu umanu, liu-liu kapasita dosente sira. Ita iha kultura ida deit, maske nasaun no bandeira diferente,” katak  eis Reitor DIT nee.

Partisipante 138

Dekan Fakuldade Teknik no Science DIT, Dr. Peregrinus Dhae Siga Taa, M.Eng,  hatete katak partisipante iha KKN Tematic Internasional 2024 nee hamutuk ema nain 138 kompostu husi estudante DIT Departamentu Teknik Sipil no Komputer Science hamutuk ema nain 121 no estudante husi UNWIRA Departamentu Teknik Sipil no Teknik Arsitek hamutuk ema nain 17 no dosente UNWIRA nain 7.

Nia hatete, atividade KKN Tematic Internasional 2024 nee bele realiza liu husi esforsu hamutuk husi Fakuldade Teknik DIT no UNWIRA Kupang ho objetivu atu hadia no sustenta relasaun institusionál entre ensinu superior rua iha implementasaun atividade edukasaun, peskiza no dezenvolvimentu rekursu umanu, no mos servisu ba komunidade ho nuansa sabedoria lokal (local wisdom).

Hau, hanesan Dekanu Fakuldade Teknik DIT, hakarak hato’o agradese no onra ba ita hotu neebe partisipa iha seremonia abertura KKN Tematic Internasional 2024 no mós agradese ba sira hotu neebé hato’o sira-nia suporta ho hanoin diak hodi bele realiza KKN tematic internasional entre DIT no  UNWIRA Kupang,” tenik  Peregrinus.

Dekanu Fakuldade Teknik DIT nee esplika katak kooperasaun DIT-UNWIRA liu husi Memorandum of Understanding (MOU) halao extensaun iha loron 14 Marsu 2023, ho partisipasaun husi Rektor DIT,  Dr. Salustiano dos Reis Piedade, MSc  no Rektor UNWIRA, Padre Dr. Philipus Tule, SVD iha UNWIRA Kupang.

Nia esplika katak, durante halao KKN Tematic Internasional 2024, estudante sira sei halao peskiza kona ba potensia Deslizamentu Rai (Tanah Longsor)  no Inundasaun (Banjir), no survey kona ba estrutura rezidensial no fasilidade públik iha Suku Manleuana, Postu Administrativu Dom Alexio, Munisípiu Dili. Survey iha terenu sei hetan apoiu husi Autoridade Lokál (Xefe Aldeia no Xefe Suku Manleuana).

“Rezultadu husi peskiza nee sei publika iha Timor-Leste Journal of Engineering and Science (TLJES.ORG) ho ISSN, Cross-Ref (DOI), DOAJ, revisaun entre nasionál no internasionál no Google Scholar index no mos publika iha jornal sientífiku husi UNWIRA,” dehan Peregrinus.

Tuir nia, Aldeia sira neebe sai fatin peskiza mak Aldeia Lau-Lora, Aldeia Manleuana, Aldeia Lisbutac, Aldeia Mauc, Aldeia Efaca no Aldeia Mane mesak.  Durante halao peskiza, estudante sira sei akompanhia husi autoridade lokal (Xefe Aldeia no Xefe Suku Manleuana). 

Peregrinus mos hatutan tan katak alein de halo peskiza kona ba deslizamentu rai no inundasaun iha Suku Manleuana, estudante sira sei halo reabilitasaun ba Kapela no Aula Multifunsionál iha Batugede hamutuk ho reprezentante komunidade.

“Atividade KKN temátiku internasionál estudante tekniku hanesan manifestasaun vontade forte husi sira-nia universidade sira atu konstrui kooperasaun institusionál trans fronteira ne’ebé hala’o iha memorandum of understanding (MOU) no memorandum of activities (MOA) ba dezenvolvimentu kapasidade no kompeténsia estudante no dosente. Ne’e mós hanesan kontribuisaun real ba dezenvolvimentu no emansipasaun komunidade iha NTT no Timor-Leste atu hetan moris ne’ebé diak liu, hamutuk no matenek ho dignidade no prosperidade hanesan komunidade no nasaun amizade no vizinhança ne’ebé forte no hamutuk reforsa sira nia-an,” dehan  Peregrinus.

Alein de nee, atividade KKN temátiku nee mós hanesan manifestasaun kontinuidade husi komitmentu forte husi UNWIRA no DIT atu harii komunidade liu husi peskiza sientífika no esforsu sosial estudante no dosente hanesan implementasaun husi Tri Dharma Perguruan Tinggi.

Antes halao peskiza, durante loron tolu nia laran, estudante sira sei simu materia ho topiku oi-oin husi dosente DIT no UNWIRA, hanesan, Dr. Aderita Takeleb Dos Santos kona ba System Planu Drainase  Sidade iha Dili, Dr. Peregrinus Dhae Siga Taa kona ba Landslide and Slope Protection, Dr. Edio  da Costa kona ba System Komputer, Dr. Natalino F. da  Silva Guterres, MT, kona ba Material selection and application (Smart Building), Dr. Don Gaspar N. da Costa, ST., MT kona ba Transportation and Land Use, Ir. Robertus Mas Rayawulan, MT, kona ba Urban Planning no Budhi  Benyamin Lily, ST., MT, kona ba Smart Building.

Iha fatin hanesan, Dekanu Fakuldade Teknik UNWIRA Kupang, Dr. Don Gaspar N. da Costa, ST., MT, reprezenta Reitor UNWIRA, Pe. Dr. Philipus Tule, SVD hato’o agradese wain ba familia boot  DIT neebe simu sira hanesan maun no alin hodi halao atividade KKN Tematiku Internasional iha Dili no fronteira.

“Espera katak liu husi atividade KKN Tematiku Internasional nee, DIT no UNWIRA bele halo buat neebe diak ba povu nasaun rua. Durante ema hatene deit katak ema tekniku sira halo deit kontrusaun ba uma, ponte, estrada no sel-seluk, maibe agora ita hatudu oinsa mak ita bele servisu ba humanidade,” dehan Gaspar.

(mik)

LEAVE A REPLY

Please enter your comment!
Please enter your name here