DILI, STLNEWS.co – Diresaun Nasional Asaun Sosial Eskolar (DNASE) fo apoiu material emerjensia ba eskola rua neebe afeita husi dezastre naturais.
Asuntu nee hatoo husi Diretor Nasional DNASE, Joaquim Martins ba jornalista sira iha sala VIP ME Vila-Verde, Dili, Tersa nee (08/08/2023).
“Ita hotu akompanha katak, dezastre naturais neebe akontese iha inisiu fulan Julhu nee akontese iha Munisipiu Likisa, Bobonaro no Kovalima, husi grau dezastre neebe iha, husi Munisipiu Likisa rai halai, entaun afeita tebes ba prosesu aprendizajen iha eskola, tanba ida nee mak ita koordena ona ho diresaun parte eskolar, iha Bobonaro EBF ida iha Kailako,” katak Martins.
Tuir Joaquim, intervensaun husi ME liu husi DNASE apoiu tiha ona material sira nee ba eskola EBF kota boot, no EBF raitete iha Kailako, material sira neebe apoiu mak hanesan kalen lisu, pregu, ai medida 5/10, nomos 6/12, konformi grau estragus neebe afeita ba eskola.
Eskola rua mak hetan apoiu, nee Likisa ho Tulo Tas, bele fo apoiu, tanba rai mak halai, material hirak nee apoiu ba eskola rua nee, iha Sesta foin daudaun, tolu nee husi DNASE labele fo apoiu, tanba ninia kondisaun, no sei submete ba infranstrutura haree asuntu nee.
“Ita hotu akompanha mudansa klimatika neebe akontese iha inisiu fulan Julhu, dezastre neebe akontese, liu-liu afeita ba ita nian eskola sira, ita koordena ho infranstrutura parte eskolar hodi haree ba kondisaun refere, ita haree ba situasaun ida nee. Nunee mos iha Munisipiu Kovalima EBF Tulo Tas kondisaun rai halai, tuir mai EBF Rraitete, iha Kailako, nomos EBF kota boot. Neebe material ba eskola rua nee ita bele dehan, total kalen duzentus e tal, ai media 5/10 no 6/12 hamutuk 60 no pregu 10 kg,” nia dehan.
Iha fatin seluk, Diretor SEM Likica, Carlos Lopes hatete, eskola rua nee agora hetan ona apoiu, orienta ona ba sira hahu hari ona grupu ba projetu konstruksaun nee, no apoiu atu halo mos bronjon ba penahan, mezmu tempu halo reabilitasaun ba eskola, eskola ida seluk mak apoiu direita kedas, tanba atu halo sala haat.
“Eskola sira bainhira halo konstruksaun, nee entrega ba iha komunitariu, komunidade mak kaer projeitu nee,” nia dehan.
Entretantu, Diretor Servisu Edukasaun Munisipiu Bobonaro, Crispin Lopes dehan, agora daudaun sei tuir hela enkontru ho Prezidente Autoridade Munisipiu ninia, tanba nee labele responde asuntu ida nee.
“Agora hau tuir hela enkontru ida ho Prezidente Autoridade Munisipiu ninia, no hau labele responde asuntu ida nee,” nia esplika.
(jac)
