DILI, STLNEWS.co – Ministeriu Edukasaun (ME) liu husi Diresaun Nasional Planu no Inkluzaun fasilita formasaun ba profesores hamutuk 120, sei tuir formasaun lian jestual no letra braille.
“Tinan nee ami nia planu fasilita profesores hamutuk 120 mak tuir formasaun lian Jestual no letra brailler no formasaun relasiona ho ema ho defisiensia sira, hodi nunee bele eleva konhesimentu no kapasidade profesor sira nian, oinsa uza termu ema ho defisiensia sira nian, hodi hanorin estudante sira iha prosesu apredizajen iha sala laran,” dehan Xefi Departamentu Edukasaun Inkluzivu husi Diresaun Nasional Planu no Inkluzaun, Jose Monteiro ba jornalista sira iha edifisiu ME, Segunda nee (11/09/2023).
Jose esplika, formasaun ba profesores hamutuk 120 nee husi munisipiu Aileu, Lautem, Dili, nee kada munisipiu ida formasaun durasaun semana ida no formador ba formasaun refere husi INFORDEPE, ME hodi eleva konhesimentu profesor sira nian uza mekanizmu oinsa atu uza hodi hanorin estudante sira.
“Agora hein atu asina akordu husi organizasaun CDTL hodi prepara sira nia dokumentu, asina akordu ho CDTL ho Ministeriu Edukasaun, hodi fasilita formasaun ba profesores sira ho lian jestual no letra brailler hodi hanorin estudante defisiensia sira hahu eskola primaria too eskola sekundaria iha territoriu laran tomak. Tanba nee mak ami ajusta hamutuk planu sira nee iha semana oin bele realiza ona formasaun ba profesores iha munisipiu tolu, hodi eleva konhesimentu no abilidade profesores sira nian hodi transmite fali siensia ba estudante ema ho defisiensia ho kualidade,” nia komenta.
Nia dehan, daudaun nee sira halo ona preparasaun materia ho profesores ensinu baziku no profesor kurrikulu sira hodi fasilita formasaun ba profesores sira oinsa atu hanorin materia lian jestual no letra brailler ba ema ho defisiensia sira ne’ebe asesu ba eskola ensinu baziku no sekundaria iha Timor-Leste. Portantu planu hirak nee sei ajusta hotu iha ministeriu hodi haruka formador husi Infordepe hanorin materia oinsa atu identifika konaba labarik sira neebe hasoru difikuldade edukasaun inkluzivu nee hanorin materia letra brailler no KDTL hanorin materia lian jestual.
Entretantu, Diretor SEM Dili, Carlito da Silva dehan, formasaun ba profesores nee importante tebes, oinsa mak profesores sira iha konhesimentu neebe diak, hodi hanorin estudante sira iha ensinu aprendizajen iha eskola.
(jac)
