DILI, STLNEWS.co – Ministeriu Edukasaun (ME) liu husi Diresaun Nasional Planu no Inkluzaun (DNPI) husi ME, apela ba inan aman labele halo diskriminasaun ba oan defisiensia sira, neebe atu asesu ba eskola.
Tuir Xefi Departamentu Edukasaun inkluzivu husi ME, Jose Monteiro ba STL iha edifisiu ME Vila-Verde, Segunda nee (17/07/2023).
“Hau hanesan Xefi Departamentu Edukasaun Inkluzivu hakarak apela ba inan aman sira katak hahu iha fulan Dezembru, tanba nee husu ba inan aman sira liu-liu sira neebe mak iha area remotas, munisipiu, postu no aldeia sira nee labele moe, tauk no labele senti oin-oin, maibe eskola neebe besik sira nian hela fatin presiza ba rejistu ita nian oan, subrinhu no familia neebe ho defisiensia nee rejistu iha nee ba, para bele asesu ba edukasaun,” tenik nia.
Nia hatete, agora laiha bareira ona, defisiensia deit tau hamutuk iha fatin ida laiha, agora labarik sira hakarak bele asesu eskola neebe mak besik, no tama iha eskola neebe deit, laos defisiensia tau hamutuk iha fatin ida, tanba la halo diskriminasaun, ema hotu tenki kompriende situasaun ida nee.
“Liu-liu ita nian oan sira, dala ruma inan aman balun moe fali atu lori ninia oan neebe defisiensia ba iha eskola, tanba labarik sira mos iha vontade atu eskola hamutuk ho sira nian kolega sira seluk. Neebe liu-liu inan aman sira dala ruma ita nian aman sai bareira ba ita nian oan, bainhira ema nia oan defisiensia susesu mak sira foin hakfodak, entaun ita labele impede ita nian oan sira,” nia afirma.
Jose dehan, familia balun keta koalia dehan labele lori oan defisiensia ba eskola, nee labele, tanba ho liafuan sira nunee mak halo diskriminasaun, laos la halo, maibe husi liafuan deit mos halo diskriminasaun, tanba nee fo oportunidade ba oan sira atu tama iha eskola neebe deit, liu-liu eskola neebe mak besik hela sira nian uma, nee para sira bele asesu, tanba kada tinan fulan Dezembru nee sempre iha matrikula.
Iha fatin seluk, Jestora programa iha ADTL,Veronica Besi hatete, husu inan aman neebe iha oan defisiensia haruka sira ba eskola, tanba sira mos iha diretu atu eskola hamutuk ho sira nian maluk sira seluk.
“Dala ruma familia mak sempre halo diskriminasaun, maibe oinsa familia bele fo apoiu ba oan defisiensia bele asesu ba edukasaun, motiva oan para bele asesu ba edukasaun,”nia afirma.
Entretantu, Leopoldino Mesquita hanesan membru iha Ahisaun hatete, ema hotu iha direitu atu asesu ba saida deit, familia idak-idak tenki iha konsiensia para bele lori oan ba eskola, liu-liu sira neebe hela iha area remotas, sira la asesu ba informasaun.
(jac)
