DILI, STLNEWS.co – Profesores hirak nee balun kontratu hela iha fatin seluk, depois sira mai kontratu fali iha Ministeriu Edukasaun (ME), sira balun asina kontratu iha ME ba programa ekivalensia ninia, depois asina kontratu ba hanorin fali, profesores 87 mak sei problema, tanba dokumentus la kompletu.
“Tanba profesores nain hira nee mos balun kontratu hela iha fatin seluk, depois sira mai kontratu fali iha ME, sira balun asina kontratu iha ME ba programa ekivalensia ninia, depois asina kontratu ba hanorin fali. Balun iha interior mai fali iha nee, tanba nee verifika dadus nee labele dupla simu osan, profesores 87 mak agora sei problema hela, tanba dokumentus la kompletu, eleitoral no konta bankaria laiha, tanba nee ME tenki halo ezersisiu boot para bele rezolve,” dehan Sekretariu Estadu Ensinu Sekundariu Jeral no Tekniku Vokasional, Domingos Lopes Lemos ba jornalista sira liu husi konferensia imprensa iha salaun ME, Tersa nee (19/09/2023).
Nia dehan, relasiona ho preokupasaun grupu husi profesores kontraradus ho total 1.499, mak ME hatoo resposta hanesan tuir mai, ME la hapara profesores kontratu sira, maibe sei halo esforsu hodi valoriza profesores sira bazea ba dekretu lei nu 31/2023 de 31 Maio. Iha dekretu lei nu 31/2023, artigu 11, konaba ingresu espesial determina hanesan tuir mai nee, espesialmente, ingresu iha kategoria profisional ho grau C mak individu sira neebe prienxe kondisoens komulativa sira hanesan tuir mai, servisu ona nudar kontratadus husi departamentu governamental responsavel iha area ensinu,ho eskluzaun nivel superior, hodi halao funsoens hanorin iha establesimentu edukasaun ou ensinu iha tinan 2023. Konaba sira nian salariu tempu badak ita sei rezolve ida nee.
Tuir Domingos, iha ona grau akademiku bacharelatu iha edukasaun, iha tinan 2022 husi UNTL, iha ambitu parseria ho Infordepe, ou habilitasaun akademika minima para ingresu iha dosensia neebe komprova ho diploma universitariu rekonesidu, iha avaliasaun ikus servisu nian, minimu ho klasifikasaun bom, neebe rejista iha SIGAP iha 2022, ME oras nee daudaun iha prosesu preparasaun ba kuadru pesoal rejime kareira dosente, tanba nee ba profesores hotu bele hola parte iha bolsa kandidatu, hodi nunee bele prienxe kuadru pesoal ba eskola hotu iha munisipiu tomak.
(jac)
