Dom Virgilio: Servisu Labele Haree Deit Osan


DILI, STLNEWS.co – Arche Bispu Metropolitan Dili, Dom Virgilio Kardeal do Carmo Da Silva hatete, sai profisional saude, enfermeiru ka mediku sira, nee hanesan vokasaun ida neebe mak Maromak haraik ona ba ema idak idak, tanba nee mak tenki servi ho igual no labele halo diskriminasaun.

“Servisu laos tanba deit osan, maibe tenki liu husi buat neebe mak imi halo juramentu, katak oinsa mak haree ema idak idak neebe mak imi trata nee, haree ema nee hanesan imajen ilhas Maromak nia, bele labarik kiik ferik ka katuas, koko hakaaas aan hodi haree, labele haree katak nee hau nia tia, tiu hau nia vizinhu, maibe ema hotu neebe mak iha imi nia oin hanesan ilhas Maromak nia, tratamentu hanesan,” dehan Dom Virgilio liu husi nia diskursu iha serimonia enseramentu ba estudante kursu enfermajen, Faculdade Siência Médicas iha Universidade Católica Timorense (UCT), iha São João Paulo, Balide, Kuarta (22/11/2023).

Hanesan Santa Tereza dehan, bainhira halo tratamanetu ba pasiente, iha neeba Jesus Maromak moris iha pasiente nia nee leet.

Bispu hatete, husi profisaun neebe mak iha, eziji ema idak idak atu hakbesik aan ba iha pesiente sira nia leet halo atandementu neebe diak no profisional, no atendimentu neebe mak ho fuan duni tuir doutrina neebe mak hetan no tuir juramentu neebe mak halo ona.

Iha fatin hanesan, Xefi Caza Civil Prezidente Republika, Jesuína M. Ferreira Gomes hatete, profisional saude nudar frontline, tanba nee presiza halo atendimentu neebe diak ba iha pasiente sira.

“Liu-liu ba iha mediku sira, profisionais saude sira, importante mak oinsa fo atendimentu neebe mak diak ba iha komunidade, tanba sira nee mak frontline, sira nee mak fo atendimentu direita ba komunidade sira, atendimentu neebe mak profisional, katak la halo diskriminasaun, atende ema hotu hanesan, labele fo fali prioridade ba ida, tanba grupu ou familia ida nee importante la halimar,” katak nia.

Jesuina hatete, se bainhira promove governasaun neebe mak diak iha rai laran, primeiru presiza iha atendimentu neebe mak diak ba iha sidadaun sira.

“Ita hakarak promove governasaun ida diak, ita hakarak promove atendimentu ida diak, nee depende ba iha profisionais saude sira, oinsa sira fo atendimentu ba iha sidadaun sira liga ba iha pasiente sira,” katak nia.

Nunee mos Reitor Universidade Katolika Timorense (UCT), Padre Joel Casmiro Pinto hatete, UCT kolabora nafatin hodi promove, eduka hodi forma estudante sira sai profisional iha futuru, hodi dedika aan ba servisu liu husi hospital referal sira no mos nasional.

Nia hatutan universidade mos prepara estudante sira oinsa mak remata sira nia estudu tun halo serbisu tenke ho professional no atende pasiente sira ho igual no labele halo diskriminasaun ba se deit.

(eme)

LEAVE A REPLY

Please enter your comment!
Please enter your name here