OEKUSI, STLNEWS.co – Ensinu Baziku Sentral (EBC – sigla portugues) 27 de Setembru Noafafo sei menus fasilidade meza no kadeira ba estudantes sira.
“Iha hau nia eskola sentrais nee foin mak hahu 2023, iha difikuldade barak mak ami hasoru, liu-liu konaba meza no kadeira neebe mak sei falta, depois livrus ba estudantes terseiru siklu nian sei menus, no ba materia hotu sei menus, tanba seidauk sufisiente ba ami nian estudante sira, nomos menus profesores neebe hanorin ita nian estudante sira, liu-liu ba terseiru siklu,” dehan Diretor Interinu EBC 27 de Setembru Noafafo RAEOA, atual kordenador EBF Nopai, Maximiano da Silva Boavida ba STL, Kinta nee (07/09/2023).
Nia dehan, profesores kontratu nain 2 ba primeiru no segundu siklu, meza no kadeira hetan estragus mak barak, tanba iha tinan hirak liu ba estadu fo ona meza no kadeira ba terseiru siklu nee kompletu, primeiru segundu siklu mak meza no kadeira seidauk kompletu.
“Ita nian estudantes balun sei tur ema nain rua-rua, dala ruma iha tempu ezame ita haruka estudantes atu tur ida-ida nee labele, tanba ita nian meza no kadeira la sufisiente ba estudante sira, fasilidade neebe ami uza nee iha tempu emerjensia ou UNTAET ninia, meza kadeira neebe mak la dura,” nia dehan.
Nia sublina, husu governu liu husi ME bele aumenta profesores iha area terseiru siklu ninia, liu-liu english, portugues, inklui aumenta livrus ba estudante sira, tanba husi EBC ida nee sei menus livrus inklui fasilidade.
Nunee mos Rosario Nunes nudar estudante dehan, sira nian livru balun iha no balun mak menus, meza kadeira sei menus ba estudante sira, dader sira tenki ba sedu eskola, ho nunee bele tuir aprendizajen.
“Ami nian meza no kadeira menus, dader ami tenki mai sedu eskola, ho nunee bele tuir aprendizajen,” nia afirma.
Entretantu, Guido Correia hanesan estudante hatete, too agora livrus ba materia balun sei menus, nunee husu ba governu oinsa fasilitas livrus ba estudante sira hodi bele lee no halo referensia ruma ba materia sira.
(jac)
