DILI, STLNEWS.co – Ensinu Baziku Filial (EBF) Aituri Laran uza bee moos tuir oras, bainhira bee maran sira tenki sosa.
Asuntu nee hatoo husi Kordenadora EBF, Filomena Guterres da Cruz ba STL iha nia knaar fatin, Kinta nee (12/10/2023).
“Ami asesu bee moos durante oras rua nian laran, bainhira ahi mate bee la funsiona, tanba ami uza bee hamutuk ho ita nian komunidade sira, no parte eskola nian ami uza dala ruma, seguransa liga ba ami nia hariis-fatin, too aula remata loraik, asuntu ida nee hatoo ona ba parte kompetente, maibe too agora ninia rezultadu laiha, tinan barak ona ami hasoru problema bee moos, agora nee bee sai ho oras deit,” nia dehan.
Nia dehan, sira uza bee moos importante mak dapur deit, tanba dapur nee mak sira ense profile tolu nee tenki nakonu, se karik iha dapur bee nakonu ona, sira rega jardim sira nee, neebe sira nian eskola uza bee moos tuir oras deit.
“Se karik bee mak la mai loron ida rua nee ami sosa, tanki ida ho osan US$ 20, total estudantes hamutuk 991, profesores hanorin 27, no sala ensinu aprendizajen ba estudantes hamutuk 10, fahe ba turnu 3,” nia esplika.
Nunee mos Domingas de Araujo Mendonca hanesan profesora hatete, sira nia bee nee dala ruma sai no la sai, tanba bee sai tuir oras, tanba numeiru estudantes mos barak, entaun eskola presiza bee moos neebe atu uza ba hariis-fatin no dapur ninia.
“Ami nian estudantes barak, ami presiza bee moos uza ba hariis-fatin no dapur, para ita nian jestora sira uza bee nee tein merenda eskolar ba ita nian estudante sira, tanba bee nee importante,” nia informa.
(jac)
