DILI, STLNEWS.co – Servisu Edukasaun Munisipiu Likisa sempre halo koordenasaun servisu ho eskola hotu, neebe eziste iha munisipiu refere.
Haktuir Diretor Servisu Edukassun Munisipal Likisa, Carlos Lopes ba STL liu husi telefone, Sabadu nee (12/08/2023).
“Hau nudar diretor prontu halo linha koordenasaun hahu husi ensinu analfabetizasaun, pre eskolar, ensinu baziku primeiru, segundu no terseiru siklu too iha nivel sekundariu no tekvo. Ninia relasaun ho sira nee diak tebes-tebes, maibe tanba ema la perfeitu, entaun kualker atividades ruma, antes implementa ka realiza, nia sempre halo kontaktu ho ninia funsionariu sira,” nia afirma.
Tanba tuir Carlos, sira sempre koordena servisu ho koordenador eskola sira, liu-liu ba iha direitor sentrais ba ensinu baziku sira, direitor sekundariu no tekvo, oinsa bele trasa planu ida neebe diak, liu-liu liga ba edukasaun iha futuru. Nomos haree ba iha dekretu lei no 3/2016, diretor edukasaun asumi tan knaar ida tutela ba iha MAE, neebe ME delega ona poder balun, hanesan pre eskolar, koalia konaba merenda eskolar.
“Koalia konaba jestaun administrasaun logistika, ensinu analfabetizasaun nee poder ida nee husi administrasaun mak jere, la hanesan ho uluk ba iha ministeriu. Tanba nee, bazeia ba atribuisaun ba iha sub programa no atividades 4, programa ida no ninia sub programa 4, hanesan ohin mensiona, ho atividades balun neebe jere husi administrasaun munisipal,” nia komenta.
(jac)
