DILI, STLNEWS.co – Estudantes defisiensia neebe asesu ona edukasaun formal, hahu husi nivel ensinu ensinu baziku too sekundariu hamutuk 4.454, dadus nee tama iha sistema emis no verifika iha 2019.
“Hanesan hau dehan daudaun nee, ita nian estudantes defisiensia neebe mak asesu ona edukasaun formal, hahu husi nivel ensinu baziku, sekundariu neebe mak asesu edukasaun formal publiku hamutuk 4.454, maibe ami sei halo verifikasaun fila-fali para atu hatene lo-loos labarik sira nee nian progresu nee halo nusa, balun pasa ona iha nivel sekundariu no universidade, depois dezafiu saida mak labarik sira enfrenta, no labarik sira nian ezistensia nee sei iha ga lae, keta balun sai ona karik, agora ami sei lao hela,” dehan Xefi Departamentu Edukasaun Inkluzivu husi ME, Jose Monteiro ba STL Segunda nee (07/08/2023).
Nia dehan, keta estudantes balun sai ona karik, ida nee tenki verifika lo-loos, uluk munisipiu 4 neebe mak sira verifika nee mak numeru estudantes 205, no munisipiu seluk daudaun nee sira sei verifika hela, seidauk hotu, tanba numeru eskola barak, nee sira halo verifikasaun iha fulan Janeiru tinan ida nee, nee mak verifika iha munisipiu haat, ho total estudantes 205.
“Maibe dadus ida 4.454 nee, nee dadus neebe ami verifika iha tinan 2019, neebe tama ona iha sistema emis, nee duni ami tenki buka hatene lo-loos tiha, tanba 2020 mai too 2021 la halo verifikasaun, tanba situasaun Covid-19, tanba eskola barak, ita ba verifika laos hotu kedas lae, no distansia eskola dook ba malu, dala ruma ba semana ida deit, sorti diak ita bele hetan eskola 10, se lae eskola la too 10, neebe eskola kada munisipiu nee laos oituan, maibe barak ho distansia dook malu,” nia dehan.
Jose akresenta, depende ba iha kondisaun transporte neebe mak iha, neebe verifika lo-loos ba tinan 2023 iha fulan Janeiru nee mak 205 nee, tanba seluk-seluk nee sira sei tau iha planu hela, bainhira halo tiha formasaun mak sira sei ba kontinua halo verifikasaun dadus sira nee iha munisipiu.
Iha fatin seluk, Diretor Ezekutivu ADTL, Cesario da Silva hatete, ema defisiensia nafatin asesu ba iha edukasaun, tanba durante nee defisiensia balun asesu edukasaun iha nivel ensinu baziku mos iha, ho nunee ba oin partisipasaun defisiensia sira nian ba edukasaun sei diak liu tan.
“Ita espera ita nian maluk defisiensia sira bele kontinua asesu edukasaun, liu-liu inan aman motiva oan sira hodi asesu ba edukasaun,” nia dehan.
Nunee mosVeronica Besi nudar Jestora Programa ADTL hatete, husu inan aman sira presiza lori oan ba eskola, tanba ida nee oan sira nian direitu hodi hetan edukasaun, hanesan ho sira nian maluk sira seluk.
(jac)
