DILI, STLNEWS.co – Embaixadora Australia iha Timor Leste, Caitlin Wilson hasoru malu ho Ministra Edukasaun (ME), Dulce de Jesus, hodi koalia konaba asuntu edukasaun.
“Ohin ami enkontru hamutuk ho Embaixadora Australia, diskuti asuntu importante tolu konaba programa edukasaun AlFA, edukasaun inkluzivu, edukasaun multi lingua,” dehan ME Dulce ba jornalista sira iha sala VIP ME, Kuarta nee (02/08/2023).
Nia dehan, programa Alfa nee laos buat foun ida ba ministeriu refere, maibe programa nee implementa iha tinan 2016 mai too ohin loron. Tanba nee, ba oin ME nafatin kontinua halo kooperasaun ho parseiru sira hodi bele apoiu iha setor edukasaun nian liga inkluziva nian, nunee ba oin bele identifika hodi servisu hamutuk ho Embaixadora Australia nian hodi tun diretamente iha terenu.
“Ita ba vizita eskola sira hodi haree programa ida eskola idak-idak neebe lao ona no planu atu halo inspesaun ba eskola sira seluk hodi apoiu atu implementa kurrikulu no halo jestaun ba sala inklui fasilita formasaun ba manorin nain sira,” dehan ME Dulce.
Nia akresenta, liu-liu diretor adjuntu eskola no gabinete apoiu tekniku nomos halo kooperasaun ho institutu formasaun professor nian iha INFORDEPE, tanba hetan apoiu barak husi parseiru sira liga setor edukasaun. Tanba nee mak ba oin servisu hamutuk hodi hadia buat ruma liu-liu prosesu aprendizajen iha eskola diak liu tan, hodi garante kualidade edukasaun iha futuru oin mai. Portantu programa tolu nee implementa iha eskola munisipiu 6.
Iha fatin hanesan, Embaixadora Australia iha Timor-Leste, Caitlin Wilson hatete, sira enkontru hamutuk ho ministra ho nia ekipa nee koalia konaba servisu kooperasaun bilateral entre Australia ho Timor-Leste, koalia konaba programa edukasaun nian.
“Tanba nee mak ami mai enkontru hamutuk ho ministra hodi apoiu no suporta feto sai lideransa iha setor edukasaun hodi garante kualidade iha futuru oin mai,”nia afirma.
(jac)
