Eskola 18 Seidauk Halo Konstrusaun Foun

DILI, STLNEWS.co – Eskola 18 iha Munisipiu Likisa seidauk halo konstruksaun foun, tanba edifisiu eskola sira nee hahu husi tempu Indonezia ninia.

Lia hirak nee hatoo husi Diretor SEM Likisa, Carlos Lopes ba STL liu husi telefone iha Likisa, Kinta nee (28/12/2023).

“Foin daudaun ita iha eskola 15 mak halo ona konstrusaun foun, no ita nian eskola sira nee mak iha ona meza no kadeira ba ita nian estudante sira, sira neebe seidauk halo konstrusaun nee seidauk iha meza no kadeira. Ita nian eskola neebe seidauk halo konstrusaun foun nee ita iha eskola 18, nee duni eskola 18 mak ita seidauk halo konstrusaun,” dehan nia.

Nia afirma, ohin numeru eskola neebe mensiona nee hahu husi nivel pre eskolar no ensinu baziku, inklui eskola sekundariu no klase paralelu iha Bazartete, edifisiu sira nee la halo konstrusaun foun, tanba edifisiu refere hahu kedas iha tempu Indonezia ninia too agora seidauk halo konstrusaun foun.

“Ita hein katak, eskola 18 nee bele halo konstrusaun foun iha tinan 2024, tanba ita nian ministeriu rezolve ida pur ida, ita nian eskola publiku iha Timor nee barak, entaun balun mak ita hahu hadia daudaun ona, no balun hein ba orsamentu, nunee ita bele rezolve kondisaun eskola sira nee, maibe hatama ona iha planu,” dehan nia.

Iha fatin seluk, Diretor SEM Dili, Carlito da Silva haktuir, konaba kondisaun eskola, balun hadia ona, maibe balun seidauk, nunee mos fasilidade hanesan meza kadeira distribui hotu ona ba eskola sira.

“Ita nian eskola balun ita halo konstrusaun foun no balun seidauk, tanba balun aumenta sala aprendizajen ba ita nian estudante sira, hau hanoin too tempu ida ita sei rezolve ita nian kondisaun eskola neebe presiza atu hadia,” nia afirma.

Entretantu, Diretor SEM Manatuto, Graciano de Jesus Baptista dehan, agora daudaun sei okupadu hela ho servisu, tanba nee depois mak fo informasaun konaba kondisaun eskola hira mak halo konstrusaun foun no reabilitasaun.

(jac)

LEAVE A REPLY

Please enter your comment!
Please enter your name here