DILI, STLNEWS.co – Eskola 79 hetan ona lisensa operasional, nee kompostu eskola privadu, publiku no eskola internasional.
Kestaun nee hatoo husi Kordenador Gabinete Lisensiamentu Akreditasaun Avaliasaun Estatistikas Edukativas husi Ministériu Edukasaun Juventude no Desportu (MEJD), Mauricio dos Reis Martins ba STL iha edifisiu MEJD Vila-Verde, Kuarta nee (28/06/2023).
Mauricio dehan, eskola sira neebe mak hetan ona lisensa operasional mak 79, no eskola 31 mak sei iha hela prosesu elaborasaun ba lisensiamentu operasional, maibe 79 nee hetan ona lisensa operasional, nee tantu eskola publiku, privadu no eskola internasional.
“Prosesu neebe ami halao mak liu husi preparasaun, molok ita nian ema sira neebe husi fundasaun ka organizasaun hirak neebe atu loke eskola, prepara dokumentus lisensiamentu halo liu konaba formatu identifikasaun, no dokumentus neebe iha kriteriu atu aplika, sira sei lori ba haree no estuda. Konaba lisensiamentu akreditasaun estabelese iha 2001 bazeia ba lei organiku ministeriu nian,” nia esplika.
Nia dehan, gabinete ida nee nian servisu mak atu implementa fo lisensiamentu ba eskola sira, tantu eskola publiku no pribadu inklui eskola internasional sira neebe loke iha teritoriu Timor laran tomak, no atu hetan lisensiamentu tenki liu husi prosesu.
“Primeiru tenki iha preparasaun, tanba atu hetan lisensiamentu tenki liu husi prosesu lisensamentu, se eskola privadu ema neebe atu loke eskola presiza iha preparasaun, kria kondisaun, bainhira kondisaun diak ona mak mai foti dokumentus para estuda,” nia afirma.
(jac)
