DILI, STLNEWS.co – Ho Eskola Bazika Filial (EBF) Rumbia neebe kloot, difisil tebes atu aumenta tan sala aprendizajen, tanba kada sala akumula estudantes 40.
Tuir Koordenador EBF Rumbia, Abilio Pereira da Conceicao afirma, espasu eskola nian kloot. Se karik iha espasu eskola nee mak aumenta sala, nee estudante sira labele lao ba mai iha areador eskola.
“Ami nian profesores hanorin hamutuk 16, kada sala estudantes 40, minimu nee 25. Ami hakarak tebes atu aumenta tan sala rua ou tolu hanesan nee, tanba ami nian estudantes nee barak, no daudaun nee ami nian sala 6 deit, nee seidauk sufisiente ba ami, agora aumenta tan sala, nee labarik sira sai eskola ba liu uma, no mai eskola tama liu sala, tanba laiha espasu ona,” dehan Abilio ba STL Kinta nee (30/03/2023)
Iha fatin hanesan, Estudante Olandino Guterres dehan, sira nian moru eskola mos laiha, tanba iha sala oin nee mak espasu ba estudante sira hamrik iha tempu rekreu, tanba iha kotuk neeba komunidade ninia uma.
“Ami nia halimar fatin laiha, tanba ami nian areador eskola nee mos kloot, iha oin nee mak rekreu ami sei halimar netik iha nee,” katak nia.
Entretantu, Luciana do Rego hanesan inan husi estudante hatete, lo-loos nee aumenta tan sala, tanba eskola ida nee komunidade neebe hela besik iha nee ninia oan eskola hotu iha nee, depois moru atu asegura estudantes mos laiha, se bele halo netik moru para labarik sira iha hotu moru laran, too tempu sai mak loke portaun.
(jac)
