DILI, STLNEWS.co – Total estudantes husi Eskola Sekundariu Nobel da Paz hamutuk 1413 partisipa iha ezame segundu periodu, no ezame nee rasik fahe ba turnu tolu.
Direitor Eskola Sekundariu Nobel da Paz, Jeremias Pinto de Jesus hatete, eskola laiha problema, maibe estudante sira nee halo problema iha estrada ibun, ohin loron datolu ona estudante sira partisipa iha ezame segundu periodu.
“Ohin tama ba loron tolu ona, maibe ita nian ezame segundu periodu lao diak tebes, tanba kada sala ita nian estudantes 50 resin, no ita fahe ba turnu tolu, balun tama dader, meudia no loraik, konaba fasilidade hanesan meza no kadeira mos laiha problema ba ami nian estudante sira, tanba ami nian fasilidade sufisiente ba ita nian estudante sira,” dehan Jeremias ba STL, Kuarta nee (26/07/2023).
Entretantu, Nuno Maia Nunes hanesan estudante segundu ano dehan, ezame nee tama tuku 8:00, entaun nudar estudante dader tenki hein bemo sedu, tanba dader nee ema barak mak hein bemo, no ezame nee rasik lao diak.
“Hau senti ami partisipa iha ezame nee diak tebes, nudar estudantes tama iha ezame ami prepara aan estuda, ohin loron tolu ona, no ezame iha eskola lao diak, tuir duni orariu neebe ami simu,” nia esplika.
Nunee mos Leonita Maia hanesan estudante primeiru ano dehan, bainhira atu hetan valor diak, primeiru liu husi estuda, maibe ezame ba loron tolu nee fasil hela, tanba materia neebe sai iha ezame nee, durante nee profesores sira fo ona.
“Ami senti ezame lao diak hela, tanba ami nian materia neebe sai iha ezame nee, ami nian profesor sira fo ona ami, no ami rasik mos estuda antes tiha ona,” nia haktuir.
(jac)
