DILI, STLNEWS.co – Husi Eskola Sekundariu Jeral (ESJ) no 4 Setembru Balide, seidauk forma ekipa komisaun organizador ba ezame II periodu, neebe sei halao iha loron 24 fulan ida nee.
Informasaun nee hatoo husi Diretor ESJ no 4 Setembru Balide, Martinho de Menezes ba STL ihs nia knaar fatin, Sesta nee (14/07/2023).
“Ohin ami foin halao enkontru ho profesores sira, liu-liu atu prepara pontus ezame segundu periodu ninia, oinsa mak ita nian profesores sira bele elabora pontus ezame ba segundu periodu, no ami foin enkontru dahuluk ba ohin loron, ami seidauk forma ekipa ida ba iha ezame refere,” dehan nia.
Martinho dehan, objetivu husi enkontru nee hodi koalia konaba oinsa mak kada profesor sira bele prepara pontus ezame ba estudante sira, tanba preparasaun ida nee mak husi eskola foin halao enkontru ho profesores sira hotu iha eskola ida nee.
“Total ita nian estudantes sira neebe mak sei partisipa iha ezame segundu periodu neebe sei halao iha dia 24 fulan nee hamutuk 3.612, total sala hamutuk 56,” nia afirma.
Nunee mos Diretor Jeral Administrasaun Jestaun no Finansas husi Ministeriu Edukasaun, Antoninho Pires dehan, ezame primeiru no segundu periodu nee lao hanesan baibain, agora ba ezame nasional nee mak tenki halo preparasaun, agora ba ezame neebe ohin temi nee, materia husi eskola mak prepara.
“Hau senti tinan-tinan nee ita nian estudantes sira sempre halao ezame ba primeiru no segundu periodu ninia, ba iha ezame refere, materia nee husi eskola idak-idak mak sei prepara ba ita nian estudante sira,” nia komenta.
Entretantu, Joaquim dos Reis Maia nudar estudante husi ESJ no 4 Setembru dehan, sira sei halao ezame iha loron 24 fulan nee, hanesan estudante kumpri nia dever estuda, ho nunee bele hetan valor diak.
(jac)
