GLENO, STLNEWS.co – Total Benefisiáriu Bolsa Meritu (BBM) iha Munisipiu Ermera hamutuk 1477. Husi numeru nee 1200 resin mak asesu ona bolsa nee, no nain 227 mak falta dokumentus.
Asuntu nee hatoo husi Diretor Edukasaun Munisipiu Ermera, Eduardo Martins ba jornalista iha EBC 10 de Abril 99 Gleno, Ermera, Sesta nee (29/09/2023).
“1477, husi numeru ida nee, 1200 resin mak asesu ona osan ba bolsa meritu, falta 227 mak seidauk asesu ba bolsa ida nee, tanba ho problema falta dokumentus hanesan, balun tanba inan mate ou aman mak mate, hela ho ema, no balun inan aman separa malu, dala ruma inan ba kaben ho mane seluk, no aman ba kaben ho feto seluk,” dehan Eduardo.
Nia katak, difikuldade ida tan mak inan aman balun la kaben, entaun difisil ba sira atu hetan sertidaun baptizmu, tanba ho sertidaun baptizmu mak bele halo sertidaun RDTL inklui halo BI, tanba nee benefisiáriu hotu tenki iha dokumentus neebe kompletu, para bele asesu ba bolsa ida nee.
“Dokumentus hanesan sertidaun RDTL no BI, ba sira neebe mak la konsege trata dokumentus, sira hotu ho dekretu neebe hanesan, hodi merese sai benifisiariu, tanba nee 227 mak falta dokumentus,” katak nia.
(jac)
