DILI, STLNEWS.co – Eskola Baziku Sentral (EBC – sigla portugues) Fatumeta iha regras interna, estudantes neebe falta tenki selu US$ 1.
Asuntu nee hatoo husi Diretor EBC Fatumeta, Feliciano Gusmao ba STL, Kuarta nee (13/09/2023).
“Ami iha regras interna husi ami nian eskola, dezde uluk too agora regras nee sei nafatin, karik ami nian estudantes neebe mak falta loron ida selu osan US$ 1, se karik falta dala rua ou tolu, husi parte eskola fo karta samada ba inan aman estudantes, maibe dala ida deit selu US$ 1,” dehan nia.
Tuir Feliciano, estudantes falta dala rua ou tolu, fo karta samada ba familia, atu nunee bele fo hanoin ba sira nian oan, loron tenki mai eskola, no labele falta beibeik, maibe dala ruma estudantes balun dader mai tarde no la tama tur iha liur deit.
“Agora numeru ida falta nee menus ona, iha ida rua mak sei halo nunee, maibe barak lae ona, ita nian estudantes balun dader mai tiha eskola tarde, lakohi tama eskola, ita ba bolu no sira halai fali. Inan aman mak tenki fo hanoin ba oan sira, dader hader mai ba eskola, tanba falta nee selu osan US$ 1,”katak nia.
Iha fatin seluk, Diretor ESJ no 4 de Setembru Balide, Martinho de Menezes dehan, eskola idak-idak iha ninia regras interna, tanba liu husi regras hirak nee mak bele halo kontrolu ba estudante sira kada loron iha eskola.
“Hau hanoin ita iha regras interna eskola nian, tanba liu husi regras sira nee ita bele halo kontrolu ba ita nian estudantes sira,” nia afirma.
(jac)
