DILI, STLNEWS.co – Atu hetan osan retroativu nee bazeia ba avaliasaun dezempenhu, neebe kada tinan halao ba profesores sira.
Asuntu nee hatoo husi Adjuntu Eskola Bazika Sentral (EBC – sigla portugues) 10 de Dezembru Komoro, Dili, Fernando da Conceicao Guterres, ba STL iha nia knaar fatin, Tersa nee (26/07/2022).
“Hau haree ba balun hetan ona osan ida nee no balun seidauk hetan, maibe osan ida nee tama direita iha konta bankaria profesor idak-idak nian, tanba sira balun mai fo hatene dehan hetan ona osan ida nee, balun seidauk hetan, osan ida nee profesor permanente deit mak bele hetan,” dehan Fernando.
Nia hatete, total profesores permanente husi eskola refere hamutuk 50, kontratu nain 2, durante implementa avaliasaun dezempenhu no skalaun sae hela deit iha KPF, maibe osan nee nafatin deit, retroativu nee bazeia ba skalaun ba profesores idak-idak nian liu husi avaliasaun dezempenhu.
Iha fatin seluk, Diretor servisu edukasaun Munisipal Baukau, Augosto Ornai Ximenes hatete, ida nee kompetensia rekursu umanus nasional ninia, tanba baze de dadus liga ho simu retroativu no la simu retroativu, nee kompetensia rekursu umanus nasional ninia.
“Ami akompanha deit ami nian profesor sira, ami nian profesor balun mai dehan, ami simu daudaun ona, balun mai dehan, ami seidauk simu, neebe atu klaru liu tan nee diak liu ita boot sira ba husu iha rekursu umanus nasional,” katak nia.
(jac)
