DILI, STLNEWS.co – Partisipasaun feto iha setor edukasaun lao diak tebes, maibe husu ba mane sira atu fo nafatin oportunidade ba feto, hodi bele asumi kargu importante sira.
Lia hirak nee hatoo husi Reitor Universidade da Paz (UNPAZ), Adolmando Soares Amaral ba STL iha nia knaar fatin UNPAZ, Tersa nee (15/08/2023).
“Hau hanoin konaba partisipasaun feto, konforme feto sira, maibe oinsa mak mane sira bele fo oportunidade, bele asumi kargu ba xefi unidade no xefi departamentu, dekanu no pro reitor, nee konforme, tanba agora nee husu ba reitor sira, se ita hakarak dezenvolve feto maluk sira iha Timor para sira mos bele kaer poder, hau hanoin oportunidade ba sira atu asumi pozisaun ruma iha instituisaun universidade ninia bele hela,” dehan nia.
Adolmando dehan, realidade neebe iha, feto sira daudaun nee asumi kargu neebe importante hanesan ho mane sira, entaun oinsa mak partisipasaun feto sira nian ba atividades hotu hodi kaer pozisaun neebe mak importante.
Iha fatin seluk, Visi Reitor III husi UNDIL, Hugo Lourenco da Costa hatete, feto sira iha kapasidade no konhesimentu neebe diak, tanba feto mos hola parte iha membru governu no iha parlamentu, nomos kargu importante sira seluk.
“Ita haree feto sira kaer kargu importante, sai membru governu no barak iha PN, tanba feto ho mane iha direitu hanesan hodi kaer resposabilidade,” tenik nia.
Entretantu, Reitor ISC, Sebastiao Perreira akresenta asuntu ida nee koalia beibeik ona, maibe durante nee feto balun tur iha PN no asumi kargu seluk, nee balun remata sira nian estudu iha ISC, nunee mos feto sira iha ISC balun asumi kargu neebe importante.
(jac)
