DILI, STLNEWS.co – Bainhira atu hetan kualidade edukasaun neebe mak diak, nee depende ba kondisaun no rekursu umanus neebe adekuadu.
Lia hirak nee hatoo husi Reitor Universidade Oriental Timor Lorosae (UNITAL), Florindo Pereira ba STL iha nia knaar fatin, Sesta nee (28/04/2023).
“Kualidade edukasaun iha TL depende ba nesesidade husi fundasaun nee rasik, no husi ministeriu oinsa mak bele apoiu fasilidade no rekursu umanus, hodi bele hetan kualidade ou bele hetan rezultadu neebe mak diak, entaun presiza mos fasilidade ho rekursu umanus neebe mak adekuadu,” nia afirma.
Florindo dehan, tanba liu husi rekursu umanus mak bele transfere sira nian matenek nee, depois iha fasilidade hanesan laboratoriu, nomos presiza fasilidade neebe mak atu uza ba eskola ninia hodi bele halo atividades nee ho diak liu tan. Konaba atu garante kualidade, sira mos koko hela haruka sira nian dosente sira ba kontinua estudu S2 ho S3, agora daudaun lao hela, liu-liu universidade sira iha Indonezia.
“Oinsa mak sira balun bele hetan bolsa, depois prepara ami nian laboratoriu, ami nian estudantes minimal bele halo pratika, aprende teoria iha klase, maibe sai mai tenki halo pratika, bele iha rezultadu inklui halo peskiza, ida nee mak ami rasik halo,” nia esplika.
Nia sublinha, agora daudaun total dosente iha UNITAL hamutuk 200 resin, total estudantes nee maizumenus novi mil itak. S1 barak mak balun buka rasik, no balun husi UNITAL mak fo bolsa, neebe agora menus ona, konaba infransturtura nee harii dadaun, atu nunee bele kompleta.
Iha fatin seluk, Hugo Lourenço da Costa nudar Visi Reitor III Asuntus Estudantil husi UNDIL dehan, prosesu aprendizajen nee iha kurikulu, tanba kurikulu mak sai padraun nasional, teknolojia para atu fasilita estudantes aprende barak, maibe nee presiza orientador mak profesor sira, liu husi prosesu sira nee mak atu bele garante kualidade, bainhira atu dezenvolve nasaun nee ho diak presiza ninia edukasaun nee tenki iha kualidade, se mak bele garante kualidade, nee instituisaun neebe mak loke rasik eskola.
“Edukasaun ho ekonomia nee iha ligasaun, ida neebe mak forti para atu bele garante kualidade, entaun governu tenki tau prioridade ba buat rua, ekonomia no edukasaun, kualidade nee integradu iha aprendizajen, tanba formador iha estudantes no kurríkulu atu fasilita saida mak ita aprende,” dehan Hugo.
(jac)
