GAT Ho Profesores Kontrola Merenda Eskolar

DILI, STLNEWS.co – Kada loron Gabinete Apoiu Tekniku (GAT) husi Eskola Bazika Sentral (EBC – sigla portugues) Fatumeta hamutuk ho Profesores halo kontrolu ba programa merenda eskolar.

“Merenda eskolar nee tuir nafatin menu husi Ministeriu Edukasaun, maibé iha nee presiza atendimentu ba fasilidade ijiene neebé presiza hadia,” dehan Gabinete Apoiu Tekniku EBC Fatumeta, Daniel Soares ba STL iha Fatumeta, Tersa nee (30/05/2023).

Nia afirma, tuir sira nia kontrolu ba merenda eskola nee mak presiza atu hadia ba ijiene nee deit, konaba nia kontrolu, presiza profesór hotu-hotu atu kontrola, tenki haree mos ijiene, menu neebe iha.

“Karik la tuir menu, ami sei relata ba iha instituisaun kompatente atu bele mai haree fali, kuandu alunus sira han mak kabun moras ka iha buat balun neebé la ijiene nee mos ami sei relata ba iha instituisaun relevante sira,” dehan nia.

Nia haktuir, tuir loron hira nia laran, jestor sira tuir nafatin ba menu neebe iha. Estudante sira nee total hamutuk 992, nee asesu hotu ba merenda eskolar, menu sira nee hanesan ai fuan no seluk tan.

Iha fatin hanesan, xefi grupu ba Jestor Merenda eskolar iha EBC Fatumeta, Virgina de Souza Soares hatete, sira tein nee hahu iha tuku 5:00 no tuku 10:00 estudante sira hahu merenda ona.

“Iha menu nee rasik ami tein modo la hanesan, loron Segunda estudante sira han ho modu, bifi ho modo tahan nomos ai fuan, Tersa halo modo ikan ho modo tahan ho etu, Kuarta modo manu tolun molhu tomate, modo tahan, fehuk ropa no senhora, Sesta fore mungo susu been no ai fuan,” katak nia.

Nunee mos Josefina da Costa hanesan estudante dehan, sira sempre asesu merenda eskolar,maibe merenda eskolar ba tinan nee la hanesan ho tinan hirak liu ba han deit etu,no tinan nee sira han ho aifuan fresku hanesan hudi,apel,aidila no seluk tan.

“kada loron ami han etu, depois de han ami han mos aifuan neebe mak prepara ona, tinan kotuk ami han deit etu, tinan nee iha mudansa ba merenda eskolar,” nia informa.

(jac)

LEAVE A REPLY

Please enter your comment!
Please enter your name here