DILI, STLNEWS.co – Ensinu Baziku Sentral (EBC – sigla portugues) 10 Dezembru Komoro halo ona pedidu ba Ministeriu Edukasaun Juventude no Desportu (MEJD), hodi bele apoiu meza no kadeira.
“Ami nia reabilitasaun sala aprendizajen neen foin mak hotu, maibe meza no kadeira too agora seidauk iha, ami nia difikuldade mak ba meza no kadeira, maski reabilitasaun ba ita nia sala neen nee remata ona, bainhira despaisu mai husi edukasaun atu entrega, nee ami hein deit,” dehan Direitor EBC 10 Dezembru Komoro, Tomas da Conceicao Soares ba STL iha nia knaar fatin, Kuarta nee (15/03/2023).
Nia dehan, reabilitasaun ba sala neen nee hahu reabilitasaun iha tinan 2021, maibe reabilitasaun nee rasik remata ona, menus meza no kadeira, nee laos iha EBC deit, maibe iha filial Bebonuk mos hanesan, too agora seidauk iha meza no kadeira.
“Iha EBF Bebonuk mos sala neen iha andar kraik no leten seidauk iha meza no kadeira, loron-loron hau sempre husu beibeik, tanba hau halo karta no ami nia pedidu nee lori ba ona iha edukasaun nasional, ami nian pedidu nee ami foin lori ba iha fulan Fevereiru ou Marsu tinan nee nian laran,” katak nia.
(jac)
