DILI, STLNEWS.co – Instituisaun Edukativa Cristal – Fundasaun Kristal (IEC-FC) realiza misa agradesimentu ba São João Bosco, iha biban nee mos halo lansamentu fatuk dahuluk ba edifisiu foun Fakuldade Siensia Edukasaun Institutu Superior Cristal (ISC) nian.
Tuir Prezidente Ezekutivu IEC-FC, Agostinho dos Santos Gonçalves katak, IEC-FC ohin halo lansamentu fatuk dahuluk ba edifisiu foun nomos misa agradesimentu ba São João Bosco.
“Ami konvida Padre Eligio Locatelli neebe uluk delegadu Antigus Alunus Dom Bosco, tanba ohin iha lansamentu fatuk dahuluk nee ami hakarak Pe. Locatelli mak halo lansamentu, maski ema Italiano, maibe ema nee fuan ho domin ba Timor-Leste,” dehan Prezidente Ezekutivu IEC-FC ba jornalista sira iha Edifisiu Kristal Balide, Kuarta(11/10/2023).
Nia haktuir, maski Padre idade ona, maibe nia mai misa para fo bensaun ba edifisiu ida nee.
“Ohin Padre fo bensaun dala ida tan ba ami, no lansamentu fatuk dahuluk ohin fo bensaun padre nia orasaun katak Kristal lori Timor ba oin no prepara leader neebe diak, maibe fuan domin Maromak nia sabedoria diak nafatin,” tenik nia.
Enkuantu edifisiu foun nee ho andar 3, ho montante orsamentu neebe konta ona hamutuk US$ 700.000 ba andar tolu ho sala 15. Nee ba fakuldade edukasaun sira mos sei halo sala hanesan loke taka para bele halo mos enkontru.
Durasaun ba konstrusaun fulan ida ho balun bele remata tanba ekipamentus mai hotu ona.
Iha fatin hanesan, Prezidente Federasaun Nasional Antigu Alunus Dom Bosco Timor-Leste, Azevedo Lourenço da Costa Marçal, nia parte hatoo parabens ba IEC-FC neebe mak ohin halo dadaun lansamentu Primeira pedra ba andar 3.
“Ami Federasaun hakarak hato parabens ba Fundasaun Kristal ida nee obra Dom Bosco nian neebe mak sei kontinua halao espanda ba Timor laran tomak no bele sai Ezemplu diak ba eskola privadu sira seluk hahu husi ensinu baziku ba too Universidade,” dehan nia.
Sira nia esperansa ba obra nee rasik hanesan antigu alunus Dom Bosco nian sei espanda liu tan formasaun ba nivel hotu hotu fo oportunidade no akomoda estudante sira barak liu tan.
Nunee mos Padre Selebrante Elígio Locatelli, antuzias ba loron ohin nian no prejeta sira hotu ba futuru neebe diak liu.
“Nudar familia saleziana ita hotu neebe halibur hamutuk iha nee familia Saleziana Dom Bosco nia oan sira no Dom Bosco hanorin ita atu hakonu nafatin ita nia moris lor loron nian sa tan iha selebrasuan boot ruma neebe hanesan ohin nee domin ba Jesus iha Eukaristia, domin ba ita nain feto no Santu padre hau hanoin katak selebrasaun nee atu atinje duni ita hotu nia domin,” katak nia.
(mar)
