ISC Fo Graduasaun Ba Estudante Nain 622

DILI, STLNEWS.co – Instituto Superior Cristal (ISC) fo graduasaun ba estudante nain 622, husi Fakuldade Edukasaun, Fakuldade Sensia Saude no Programa Mestradu. Graduasaun ba dala 15, tinan 2023.

“Ohin estudante hamutuk nain 622 graduasaun ona, mai husi fakuladade oi-oin. Titulu nee responsabilidade, laos hetan grau titulu, maibe tenki dezenvolve, balun bele kontinua estudu, balun implementa saida mak sira hetan durante sira tuir aula, hodi nunee bele responsabilidade ba nia aan rasik, ba familia, nomos ba Timor,” hatete Reitor ISC, Sebastiao Pereira ba jornalista sira iha CCD, Sabadu (16/12/2023).

Nia dehan, atu servisu ou la servisu, tanba deside inisiu nee funsionariu barak mak agora tuir graduasaun, nia fiar katak governu presiza rekursu barak.

“Dadus nain hira mak servisu no la servisu ita seidauk identifika loos, tanba nee persiza halo estudu,” nia esplika.

Iha fatin katak, Ministru Edukasaun Superior, Siensia no Kultura, Jose Honorio da Costa Pereira Jeronimo agradese ba ISC neebe fo graduasaun ba estudante lubuk ida, no bele kontribui ba dezenvolvimentu.

“Ita nia rekursus umanus importante tebes-tebes, agradese ba ISC bele halo graduasaun ba estudante sira,” nia deklara.

Nia mai partisipa serimonia graduasaun ISC nia atu haree no ba koalia ho universidade sira, liu-liu estrutura universidade para haree parte neebe mak governu bele koalia.

“Ita hakarak haforsa kualidade, maibe ita tenki hahu buat ruma, governu nia obrigasaun tomak atu bele apoiu ensinu superior privadu sira nee,” nia informa.

Nunee mos graduada ISC, Olinda Guterres katak, iha momentu nee mak nudar marka ida hanesan estudante no sai rekursu foun ba vida profisional, hotu-hotu hatais togas ho orgulhu, no taka sapeu metan iha ulun, nakonu ho sakrifisiu no servisu todan nudar estudante.

(jen)

LEAVE A REPLY

Please enter your comment!
Please enter your name here