DILI, STLNEWS.co – Kazu Oknum Membru Polisia Nasional Timor Leste (PNTL) ho inisial DJ neebe tiru joven ida ho naran Julivio Perreira Bruno iha Bidau, iha loron 16 fulan Setembru tinan nee, oras nee daudaun suspeitu iha ona sela detensaun hodi hein prosesu investigasaun.
Portavoz Nasional PNTL, Superentendente Antonio da Luz hatete, akontesementu ida neebe mak akontese iha dia 16 Setembru. Iha akontesimentu nee iha joven sira iha Bairo Bidau, tuir lo-loos iha 10 oras kalan ba leten nee ema presiza deskansa, maibe joven sira nee halo barulhu besik tuku 3:00 madrugada.
“Tanba nee mak ita nia membru ho inisial DJ, senti katak joven sira nee halo barulhu, entaun nia sai mai fo hanoin didiak ba sira katak labele barulhu, tanba ema presiza deskansa, maibe joven ida nee hamrik insulta kedas membru ida nee,” tenik nia ba jornalista sira iha Edifisiu Komandante Jeral PNTL Kaicoli, Dili, Segunda (18/09/2023).
Nia konta tuir kronolojia katak, joven nee insulta no tolok atu baku tan membru ida nee, tanba nee mak membru nee senti katak joven nee atu baku nia, entaun nia tiru fo atensaun ba joven nee, maibe joven nee kontinua nafatin, tanba nee mak membru nee foti pistola tiru kedas joven nee nia ain.
Nia akresenta, iha momentu neeba kazu nee akontese nia membru sira husi investigasaun tun kedas hodi asegura, agora daudaun nia iha sela no prosesu kontinuasaun lao hela.
Nia hatete, kazu nee nia prosesu Investigasaun ho Nuc 0256/2023PNCIC, prosesu nee 72 horas no sei enkamina ba iha Ministeriu Publiku hodi hodi hein prosesu kontinuasaun.
(mar)
