DILI, STLNEWS.co – Ministeriu Superior Siensia no Kultura (MESKK) halao enkontru dahuluk ho konselhu reitores sira iha universidade hotu, hodi rona sira nian hanoin konaba dezafiu saida mak universidade sira hasoru.
“Ohin foin primeira vez, Ministeriu Ensinu Superior enkontru ho konselhu reitores, ensinu superior iha Timor nee hamutuk 19, ministru halo enkontru ho sira, hodi rona sira nia hanoin para governu bele halo buat ruma iha futuru mai ba ensinu superior sira iha TL, reitores sira fo hanoin no fo opiniaun, oinsa bele dezenvolve ensinu superior neebe diak, kualidade iha futuru,” dehan Ministru Superior Siensia no Kultura (MESKK), Jose Honorio da Costa Pereira Jeronimo ba jornalista sira iha Hotel Novo Turizmu, Sesta nee (18/08/2023).
Ministru MESKK dehan, hanesan ministru tenki rona reitor sira nian hanoin, tanba membru konselhu reitores importante, imput neebe sira fo, ministru bele uza ida nee sai auput ida diak bele halo desizaun ruma neebe diak ba ensinu superior sira iha TL.
“Hau foin enkontru primeira vez ho ita nian reitores sira, sira husu atu hadia atende ruma iha Ministeriu Ensinu Superior, nee diak, tenki hanesan nee duni. Hau hanoin hanesan ministru foun iha ensinu superior agradese ba sira, tanba sira bele fo hanoin buat balun MESKK bele melhora diak liu tan servisu. Primeiru mak nee, antes atu loke programa foun tenki iha lisensa, nee regras neebe mak iha,” nia esplika.
Iha fatin hanesan, Diretor Ezekutivu ANAAA, Nilton Paiva dehan, primeira parte enkontru nee konselhu reitores neebe mak MESKK konvida reitor husi universidade iha Timor laran, atu bele mai rona esplikasaun ruma husi ministru foun, no dezafiu saida deit mak reitor sira hasoru, maibe partisipa ANAAA nian ba enkontru nee hanesan observador.
“Ita hatene katak, servisu atu ajuda ministru iha parte akreditasaun ninia, nee mos la sees husi ensinu superior sira, tantu publiku no privadu, nee sempre hasoru reitor sira, tanba nee, ANAAA partisipa iha enkontru nee hanesan observador, atu haree reitor sira nian dezafiu neebe mak ita nian ensinu superior sira hasoru,” nia komenta.
Nunee mos Reitor UNPAZ Adolmando Soares Amaral hatete, ida nee hanesan primeiru runiaun iha mandatu ministru ninia ba edukasaun ensinu superior, foin primeira vez ministru konvoka runiaun konselhu reitoria.
“Ita iha VIII Governu anterior, konselhu reitores tinan ida dala ida, hau hanoin tanba ministeriu ida nee ninia parseiru estratejiku mak universidade sira, no runiaun konselhu reitores nee labele tinan ida dala ida, se bele tama fulan tolu ou neen, neebe iha tinan ida bele akontese dala tolu, tanba parseiru estratejiku ministeriu ida nee mak ensinu superior sira,” tenik nia.
Adolmando dehan, presiza enkontru beibeik para bele fo hanoin ba ministru, para politika ensinu superior tenki aposta tuir dinamiku neebe lao iha ensinu superior sira, nee mak hamosu programa foun, depois programa sira neebe iha Timor laiha.
“Ita bele fokus no alternativa nesesidade nasaun nian, hau haree hanesan departamentu konaba maritima, nee ita seidauk iha, depois konaba teknolojia, hau hanoin ida nee mak ita tenki tau atensaun, tanba programa sosiais nee barak los ona. Hau hanoin ba oin nee ita haree fali programa exata sira,” nia afirma.
(jac)
