DILI, STLNEWS.co – Profesores kontratu 2023 fo hanoin ba Ministra Edukasaun (ME) atu bele konsidera sira, bele tama iha rejime ingresu espesial tuir dekretu lei nu 31/2023, kapitulu II, artigu 11, neebe prezidente rasik promulga ona.
“Ami profesores kontratadu 2023 hamutuk 1.449, feto no mane ho laran tristi marka ami nia pozisaun no hatoo ami nia lamentasaun ba nain ulun Estadu Timor Leste nian, liu-liu Ministeriu Edukasaun mak hanesan tuir mai nee, ami profesores kontratadu 2023 diskorda no la menta tebes ho ministra nia deklarasaun iha leten, tanba hamosu diskriminasaun entre ami profesores kontratadu foun no tuan. Ami husu ba ministra atu klarifika ba ami konaba dekretu lei nee, artigu hira mak bandu ami profesores kontratadu 2023 labele tama iha ingresu espesial, no la preve ami nia statutu,” dehan porta voz profesores kontratu 2023, Amalia Rodrigues Ximenes ba jornalista sira liu husi konferensia impresa iha jardim 5 de Maio, Kolmera, Tersa nee (19/09/2023).
Nia dehan, profesores sira neebe asina kontratu iha tinan 2023 la tuir ka laiha kuadru pesoal, maibe ministeriu iha obrigasaun tomak atu selu tuir kontratu, no halo mos despedementu ka la renova kontratu ba profesores sira, ministra mos dehan dekretu lei nee la preve statutu ba profesores kontratu 2023 nian, nunee ministeriu sei loke fali vagatura foun depois mak profesores sira ba hatama aplikasaun tuir teste, hodi resposta ba profesores sira nia perguntas iha altura vizita. Tuir mai iha loron Kinta, dia 14 Setembru 2023, Ministra Edukasaun husi IX Governu nian deklara momos, dala ida tan ho lifuan neebe antes nee deklaran iha media oline hanesan smnews, stlnews, sapnews no media seluk-seluk tan, iha enkontru planu programa no orasamentu ba Ministeriu Edukasaun nian ba tinan 2024 no tinan 5 mai iha salaun Delta Nova, Komoro.
“Ami profesores kontratadu 2023 diskorda no lamenta tebes ho ministra nia deklarasaun neebe hateten ami la tuir kuadru pesoal husi Ministeriu Edukasaun nian, maibe realidade ami kompete ba vaga 2.111 neebe fo sai husi Ministeriu Edukasaun iha tinan 2021/2022 no tuir kriteriu i hetan avaliasaun husi juri. Ami husi profesores kontratadu 2023 diskorda no lamenta tebes ho deklarasaun ministra nian neebe hateten, ami la tuir dalan legal ka la tuir lei, ekuantu ami nia naran publika iha jornal republila tuir lei. Ami profesores kontratadu 2023 diskorda no la aseita ho hanoin Ministra Edukasaun no Sekretariu Estadu Ensinu Sekundariu no Tekniku Vokasional neebe atu halo fila fali teste ba ami, se karik halo duni teste, diak liu aplika ba profesores kontratu tuan hotu, laos ba ami kontratu 2023 deit,” nia dehan.
Iha fatin hanesan, Agostinho Pinto hanesan profesor kontratu 2023 dehan, ME Dulce dehan dekretu lei nu 31/2023 la preve sira nian estatutu no la konsidera sira, tanba nee husu ba ME, hatete lo-loos katak, dekretu nee artigu hira mak bandu sira no konsidera deit ba sira neebe kontratu iha 2022 nian ba kraik.
“Antes ME pronunsia vaga ba ami, dekretu lei nu 4 nu 5 neebe preve atu kriasaun de juri, se buat ruma falhansu, husu ba juri neebe estabelese husi ME, no laos fo kulpa ba ami, laos hapara fali ami nian kontratu, tanba iha nee ba kriteriu barak los, iha nee ba haree husi lisensiatura minimu bacharelatu, segundu haree ba durasaun tempu voluntariu iha eskola,” dehan Agostinho.
(jac)
